Abasirikare bakuye perezida wa Mali kubutegetsi mu kwezi gushize bahawe kugeza ku itariki ya 15 y’uku kwezi kwa cyenda ngo babe bamaze gushyiraho perezida w’umusivile wo kuyobora inzibacyuho.
Umuryango w’ubukungu w’ibihugu by’Afurika y’uburengerazuba (CEDEAO/ECOWAS) wavuze ko hagomba gushyirwaho perezida w’umusivile na minisitiri w’intebe w’umusivile bakayobora igihugu kugeza habaye amatora.
Gusa kugeza ubu abahiritse ubutegetsi muri Mali ntacyo baravuga ku mugaragaro kuri ibyo byatangajwe ejo ku wa mbere mu nama yitabiriwe n’abakuru b’ibihugu umunani bo mu muryango wa CEDEAO – ugizwe n’ibihugu 15 – yabereye i Niamey mu murwa mukuru wa Niger.
CEDEAO yo irashaka ko inzibacyuho imara umwaka umwe,gusa mu gihe cyashize abasirikare bahiritse ubutegetsi bavuze ko bashaka “igihe kirimo gushyira mu gaciro”, bavuga ko nibura bahabwa inzibactuho y’imyaka ibiri.
Dore ko bamaze igihe bari mubiganiro n’abanyapolitike batandukanye b’imbere mu gihugu biga kunzibacyuho.
Mumpera z’icyumweru gishize, Perezida wahiritswe Ibrahim BoubacarKeïta yemerewe gusohoka mu gihugu yerekeza muri Emira muri leta Zunze Ubumwe z’Abarabu kwivuza indwara y’imitsi yo mu bwonko.
Mu ijoro ryo ku itariki ya 18 y’ukwezi kwa munani ubwo yari yafashwe n’abasirikare, yatangarije kuri televiziyo y’igihugu koyeguye.
Mbere yuko ahirikwa, abatavuga rumwe n’ubutegetsi bari bamaze amezi basaba ko yegura, bamushinja kuba intandaro yo kuzamba k’ubukungu, ruswa no kunanirwa guhashya intagondwa zigendera ku mahame akaze ya kisilamu.
