Muri Repubulika Iharanira Demokarasi ya Congo, Abashinwa batatu batawe muri yombi nyuma yaho bafatanwe ibice by’amabuye ya zahabu ndetse n’amafaranga menshi y’amadorali agera ku bihumbi 800.
Aba bashinwa bakaba barafatiwe mu burasirazuba bwa Repubulika Iharanira Demokarasi ya Congo nyuma y’amakuru yari yatanzwe n’abamwe mu bantu batabashije gutangazwa amazina mu rwego rwo kurinda umutekano wabo.
Ifatwa ryaba bashinwa ryabaye ku munsi wejo tariki ya 6 Mutarama 2024, Aho nyuma yo kumenya amakuru yuko hari abashinwa batatu bafite zahabu ndetse n’amafaranga menshi cyane inzego z’umutekano mu ntara ya Kivu y’amajyepfo zakurikiranye aba bashinwa birangira zibataye muri yombi nyuma yo kubasaka zigasanga bahishe izo zahabu n’amafaranga munsi y’intebe z’imodoka bari bicayemo.
Ifatwa ry’aba bashinwa rikaba ryarabereye muri teritwari yitwa Walungu mu ntara ya Kivu y’amajyepfo, nyuma yo gufatwa kwaba bashinwa, Guverineri wiyi ntara, Bwana Purusi yatangaje ko bamwe mu bantu nkaba bakora ubucuruzi bw’amabuye y’agaciro butemewe ndetse baba bafitanye umubano wihariye n’abamwe mu bayobozi biki gihugu babarizwa mu murwa mukuru Kinshasa nkuko amakuru dukesha BBC abivuga.
Itabwa muri yombi ry’aba bashinwa batatu ribaye mu gihe mu minsi ishize nanone hari itsinda ry’abashinwa ryari ryafashwe rishinjwa kugira ikirombe cya zahabu mu buryo bunyuranyije n’amategeko .
Uyu mutungo kamere w’amabuye y’agaciro ukomeje gusahurwa n’amatsinda atandukanye y’abanyamahanga kuva mu gihe cy’ubukoloni ndetse iyo ni imwe mu mpamvu z’ingenzi zituma aha mu burasirazuba bwa Congo Kinshasa hamaze imyaka irenga 30 hugarijwe n’umutekano mucye.
Imitwe yitwaje intwaro igenzura ibirombe byinshi mu burasirazuba bwa Repubulika Iharanira Demokarasi ya Congo ndetse abakuru b’iyo mitwe babikiriramo kubera kugurisha amabuye y’agaciro ku bandi bantu maze nabo bantu bakayagurisha ku bandi.
