Arsenal na Manchester United zishobora guhurira kuri Final ,uko tombora ya 1/4 muri Europa League yagenze
Amakipe abiri ahora ahanganye cyane yo mu gihugu cy’Ubwongereza ariyo ikipe ya Arsenal ndetse n’ikipe ya Mnchester United zishobora guhurira ku mukino wa nyuma mu irushanwa rya Europa League uyu mwaka.
Ibi bibaye nyuma ya Tombora ya 1/4 mu mikino ya Europa League yaberaga mu gihugu cy’Ubusuwisi mu mujyi wa Nyon kuri uyu munsi tariki ya 19 Werurwe 2021, aho yasize ikipe ya Arsenal na Manchester United zishobora guhurira ku mukino wa nyuma mu gihe zaba zitwaye neza muri 1/4 kubera ko inzira zazo zitandukanye ku buryo bidashoboka ko zahura mu mikino ya 1/2.
Nkuko tombora yabigaragaje ikipe ya Manchester United inafite igikombe cya Europa League yigeze gutwara izahura n’ikipe ya Granada yo mu gihugu cya Espagne, Arsenal yigeze gutsindwa ku mukino wa nyuma wa Europa n’ikipe ya Chelsea mu mwaka wa 2019 izahura n’ikipe ya Slavia Prague yo muri Czech Republic, Ajax yo mu Buholandi yatomboye kuzahura na Roma yo mu Butaliyani naho ikipe Dinamo Zagreb itombora ikipe ya Virrareal yo muri Espagne.
Imikino ibanza ya 1/4 kirangiza izaba tariki ya 8 Mata 2021, naho imikino yo kwishyura ibe tariki ya 15 Mata 2021, imikino ibanza ya 1/2 iteganijwe kuba tariki 29 Mata 2021, mu gihe imikino yo kwishyura izaba tariki 6 Gicurasi 2021, naho umukino wa nyuma ukazabera muri Poland kuri Stade yitwa Gdańsk Arena tariki ya 26 Gicurasi 2021.
