Arsenal yongeye gutizwa umukinnyi Dani Ceballos ku nshuro ya kabiri
Umukinnyi wo hagati mu kibuga Dani Ceballos ukomoka mu gihugu cya Espagne, usanzwe ari umukinnyi w’ikipe ya Real Madrid, yongeye gutizwa mu ikipe ya Arsenal ku nshuro ya kabiri, nyuma y’uko igihe yari yaratijwe cyari kimaze kurangira.
Arsenal yamaze gutangaza ko yagaruye umukinnyi Dani Ceballos ku ntizanyo y’umwaka umwe, ndetse umutoza w’ikipe ya Arsenal Mikel Arteta, akaba yavuze ko yishimiye kongera kubona uyu mukinnyi mu ikipe abereye umutoza kandi yizeyeko azabasha cyane mu kibuga hagati.
Mikel Arteta yagize ati” Nishimiye kongera kubona Dani Ceballos mu ikipe yanjye, ni umukinnyi w’ingenzi cyane mu ikipe yacu, ndetse ni umwe mu bitwaye neza mu mwaka ushize w’imikino, kuko yasoje umwaka ari ku rwego rwiza cyane, nkunda uburyo agira ishyaka mu kibuga ndetse ni umukinnyi ukinisha ubwenge cyane, tunejejwe no kongera kumuha ikaze”.
Uyu mukinnyi Dani Ceballos yakinnye imikino 37 umwaka ushize w’imikino atsinda ibitego bibiri muri Arsenal, ndetse akaba yarafatanije n’iyi kipe kwegukana igikombe cya FA Cup cy’uyu mwaka batsinze ikipe ya Chelsea ku mukino wa nyuma ibitego 2-1, gusa igikombe cya Community Shield bagitwaye adahari yarasubiye iwabo kuko intizanyo yari yarangiye.
Dani Ceballos abaye umukinnyi wa gatanu ikipe ya Arsenal isinyishije, nyuma ya Gabriel baguze muri Lille, Willian wavuye muri Chelsea ku buntu, Cedric Soares, Pablo Mari ndetse William Saliba wakuwe mu ntizanyo yarimo mu ikipe ya St Etienne, ndetse Arsenal ishobora gutangaza mu minsi ya vuba ko Aubameyang yongereye amasezerano.
