Aubameyang yafashize Arsenal kubona insinzi nyuma yo gutsinda Hatrick ya mbere muri Premier League
Rutahizamu Pierre Emerick Aubameyang ukomoka mu gihugu cya Gabon usanzwe akinira ikipe ya Arsenal, yafashize iyi kipe kwegukana amanota atatu ku mukino bakinagamo n’ikipe ya Leeds United nyuma yo gutsinda ibitego bitatu (Hatrick) muri uwo mukino.
Aubameyang ibi yabikoze mu mukino wa Shampiyona y’igihugu y’Abongereza wari wahuje ikipe ya Arsenal ndetse n’ikipe ya Leeds United, umukino warangiye Arsenal itsinze ibitego 4-0 harimo ibitego bitatu bya Aubameyang watsinda Hatrick ya mbere kuva yagera muri shampiyona y’Abongereza muri 2017.
Kugeza kuri ubu Aubameyang amaze kuzuza ibitego 8 muri shampiyona uyu mwaka mu mikino 20 amaze gukina, ikindi kandi akaba amaze gutsinda ibitego 200 muri shampiyona 5 zitandukanye zikomeye ku mugabane w’iburayi mu mikino 369, igitego cya mbere akaba yaragitsinze mu mwaka wa 2009 ubwo ikipe ya Lille yakinaga na A s Monaco.
Aubameyang yakiniye amakipe atandukanye harimo ikipe ya Lille yatsindiye ibitego 2, As Monaco yatsindiye ibitego 2, St. Etienne yatsindiye ibitego bigera kuri 37, hakaza kandi ikipe ya Borussia Dortmund yo mu gihugu cy’Ubudage yatsindiye ibitego 98 ndetse n’ikipe ya Arsenal arimo kugeza ubu akaba amaze kuyitsindira ibitego 61 kuva yayigeramo mu mwaka wa 2017 avuye mu ikipe ya Borussia Dortmund.
