Muri iyi weekend twaraye dusoje ku kiyaga cya Muhazi kuri King Fisher hasozwaga imikino y’intoki ikinirwa ku mucanga izwi nka Rwanda Beach Volleyball phase ya kabiri, aho bamwe mu bakinnyi dusanzwe tumenyereye bitwaraga neza.
Iyi phase ya kabiri ya Rwanda Beach Volleyball yaberaga kuri King Fisher yari yitabiriwe n’amakipe agera kuri 22 mu bagabo ndetse n’abagore, Aho mu cyiciro cy’abagore igikombe cyongeye kwegukanwa n’ikipe ya Munezero Valentine na Mukandayisenga Benitha nkuko bari babikoze muri phase ya mbere ya Rwanda Beach Volleyball.
Iyi kipe ya Benitha na Valentine ikaba yaregukanye iki gikombe nyuma yo gutsinda amaseti 2-0 ikipe ya Musabyimana Penelope na Sharon Amito, Mu gihe umwanya wa gatatu wegukanwe n’ikipe ya Yankurije Froncoise na Nirere Aliane nyuma yo gutsinda ikipe ya Ndagijimana Iris na Sande Meldinah amaseti 2-0.
Mu cyiciro cy’abagabo igikombe cyegukanwe n’ikipe ya Paul Akan na Koita Jahara nyuma yo gutsinda ikipe ya Ntagengwa Olivier na Akumuntu Kavaro Patrick amaseti 2-0 (21-15, 21-19), Mu gihe umwanya wa gatatu wegukanwe n’ikipe ya Nzirimo Mandela na Niyikiza Revis nyuma yo gutsinda ikipe ya Muyisenge Jean Paul na David Neeke amaseti 2-1 (17-21, 21-17, 15-8).
Amakipe yabaye aya mbere akaba yarahawe ibikombe, imidari ndetse n’ishimwe ry’amafaranga y’u Rwanda ibihumbi 300, Naho amakipe ya kabiri akaba yarahawe imidari ndetse n’ishimwe ry’amafaranga y’u Rwanda ibihumbi 200, Mu gihe amakipe yegukanye umwanya wa gatatu yahawe imidari ndetse n’amafaranga ibihumbi 100.
Iri rushanwa rikaba rizakomeza mu kwezi kwa gatandatu uyu mwaka hakinwa phase ya gatatu yaryo nyuma y’uko phase ebyiri zimaze kurangira, aho iyi phase ya gatatu biteganijwe ko izakinirwa ku mucanga wo mu karere ka Rubavu.
