Ishyirahamwe ry’umupira w’amaguru muri Afurika, CAF, ryamaze gufatira ibihano Jean Claude Girumugisha, umukinnyi ukomeye w’ikipe ya Al Hilal yo mu gihugu cya Sudan ndetse n’ikipe y’igihugu y’Uburundi.
Ibi bibaye nyuma y’imvururu zakurikiye umukino wahuje ikipe ya Al Hilal yo muri Sudan ndetse n’ikipe ya MC Alger yo mu gihugu cya Algeria mu matsinda y’irushanwa rya CAF Champions League, Mu mukino warangiye ikipe ya Al Hilal itsinze MC Alger ibitego 2-1.
Nkuko byasohotse mu itangazo CAF yashyize hanze, Jean Claude Girumugisha yamaze guhagarikwa imikino itatu adakina ndetse anacibwa amande angana n’ibihumbi bitanu by’amadorali ($5,000).
Mu mikino uyu mukinnyi yahagaritswe atemerewe gukina harimo umukino uzahuza ikipe ya Al Hilal n’ikipe ya St Eloi Lupopo yo muri Congo Kinshasa ndetse n’imikino ibiri izahuza ikipe ya Al Hilal n’ikipe ya Mamelodi Sundowns.
Komite ya CAF ishinzwe imyitwarire yemeje ko nta kibazo cyigeze kiba cyo gutera icupa ry’amazi ku ntebe y’abatoza b’ikipe ya MC Alger nk’uko byari byatangajwe mbere ndetse ibi bihano yafatiwe bishingiye gusa ku myitwarire idahwitse (unsportsmanlike conduct).
Ibi bihano byafatiwe Girumugisha bikaba ari igihombo gikomeye ku ikipe ya Al Hilal muri uru rugendo rw’amatsinda ya CAF Champions League kuko uyu mukinnyi ari umwe mu nkingi za mwamba ziyi kipe.
Ese Al Hilal izabasha kwitwara neza idafite umukinnyi wayo w’ingenzi kurusha abandi? Reka tubitege amaso.
