Chelsea yiteguye gutanga abakinnyi batandatu kugirango ibone miliyoni 90 z’amayero zo kugura Kai Havertz
Ikipe ya Chelsea ikomeje kwiyubaka cyane, kugirango umwaka utaha w’imikino izabe ihagaze neza kurushaho, kuri ubu yiteguye kugurisha abakinnyi bagera kuri batandatu kugirango ibashe kubona amafaranga yo kugura umukinnyi w’ikipe ya Bayer Leverkusen ukina mu kibuga hagati Kai Havertz ukomeje kwitwara neza muri iyi kipe yo mu budage.
Uyu musore w’imyaka 21 ukomoka mu gihugu cy’ubudage, akomeje guca ibintu muri shampiyona y’abadage izwi nka Bundesliga, aho muri uyu mwaka w’imikino amaze gukina imikino 43, akaba amaze gutsinda ibitego 9 ndetse anatanga imipira yavuyemo ibitego igera kuri 17. ikipe yose yifuza kugura uyu mukinnyi igomba kwishyura Bayer Leverkusen miliyoni 90 z’amayero kugirango abe yayisohokamo.
Ikipe ya Chelsea n’imwe mu makipe yifuza kugura uyu musore, kugirango imwongere kuri Timo Werner ndetse na Hakim Ziyech bamaze kugurwa n’iyi kipe itozwa na Frank Lampard. Ibi byatumye iyi kipe itangazako igiye gushyira kw’isoko abakinnyi batandatu, abavugwa ni Marcos Alonso, Michy Batshuayi, Danny Drinkwater, Bakayoko, kenedy ndetse na Emerson kugirango iyi kipe ibashe kuba yagura uyu musore Kai Havertz.
Chelsea ikomeje urugamba rwo guhatana kugirango irebeko yaza mu makipe 4 ya mbere muri shampiyona y’abongereza, byayifasha kuzakina imikino ya champions league umwaka utaha.iyi kipe kuri ubu ifite amanota 57 ikaba iri ku mwanya wa 4 inyuma ya Leicester city ifite amanota 58, bikaba bigishoboka cyane ko iyi kipe ya Lampard igomba kuzagaragara muri champions league umwaka utaha.
