Rutahizamu usatira aca ku mpande Ishimwe Kevin wari usanzwe akinira ikipe ya APR Fc, yamaze gutizwa ikipe ya Kiyovu Sport nkuko ubuyobozi bw’ikipe ya APR Fc bwamaze kubyemeza.
Ubusanzwe Ishimwe Kevin ntabwo yari akibarizwa mu mwiherero w’ikipe ya APR Fc, kuko yari yarakuwe mu mwiherero w’iyi kipe biturutse ku busabe bw’umutoza Mukuru w’iyi kipe y’ingabo z’igihugu Muhamed Erradi Adil.
Nkuko byatangajwe n’umunyamabanga Mukuru w’ikipe ya APR Fc, yavuze ko amakuru yo gutiza Ishimwe Kevin ariyo kuko yari agifitiye iyi kipe amasezerano y’umwaka umwe, kuko yari yasinye imyaka ibiri.
Uyu musore uheruka no kurushinga byemewe n’amategeko, yagiye anyura mu makipe atandukanye, harimo ikipe ya Pepiniere, As Kigali ndetse n’ikipe ya APR Fc yari arimo kugeza ubu, akaba ari umusore uzwiho ubuhanga bwinshi ku mupira.
