Kuri uyu munsi tariki ya 8 Mutarama 2025, ku gicamunsi nibwo ikipe ya Apr Fc yerekanye abakinnyi babiri bayo bashya iheruka gusinyisha guturuka mu gihugu cya Uganda.
Aba bakinnyi berekanwe n’ikipe y’ingabo z’igihugu barimo umukinnyi ukina aca ku mpande witwa Hakim Kiwanuka wasinyiye iyi kipe aguzwe mu gihugu cya Uganda mu ikipe ya Viila Sport Club ndetse na mugenzi we ukina nka rutahizamu witwa Denis Omedi waguzwe mu ikipe ya Kitara Fc yo mu gihugu cya Uganda.
Aba bakinnyi bombi bakaba basanzwe bakinira ikipe y’igihugu ya Uganda yaba ikipe nkuru ndetse n’ikipe y’igihugu y’abakinnyi bakina imbere mu bihugu byabo (CHAN) ndetse uyu Hakim Kiwanuka akaba ari nawe uheruka gutsinda igitego ikipe y’igihugu ya Uganda yatsinze ikipe y’igihugu y’Uburundi mu mukino wo kwishyura mu gushaka itike ya CHAN.
Rutahizamu Denis Omedi mu mwaka ushize w’imikino yabaye umukinnyi mwiza wa kabiri watsinze ibitego byinshi muri shampiyona ya Uganda, aho yatsinze ibitego 15 gusa muri uyu mwaka w’imikino akaba nta gitego na kimwe yari yagatsinze mu mikino igera ku 11 yagaragayemo mu ikipe ya Kitara Fc, Mu gihe mugenzi we Hakim Kiwanuka wakiniraga ikipe ya Villa Sport Club yari amaze gutsinda ibitego bigera kuri 5 muri shampiyona yuyu mwaka ndetse umwaka ushize akaba yarafashije iyi kipe ya Villa kwegukana igikmbe cya Shampiyona.
Aba bakinnyi bombi ikipe ya Apr Fc ikaba yabasinyishije kugirango bazayifashe mu mikino yo kwishyura ndetse no mu gikombe cy’amahoro, bikaba binavugwa ko ikirimo gushaka nundi mukinnyi ukina ku mpande yataka kubera ko abo ifite umutoza atabizeye cyane ko babasha kumuhesha igikombe.
Kuri uyu munsi kandi ikipe y’ingabo z’igihugu ikaba yari yasuye ikipe ya Marine Fc mu karere ka Rubavu mu mukino wa shampiyona ariko w’ikirarane, Uyu mukino ukaba waje kurangira ikipe ya Apr Fc itsinze ibitego 2-1 cya Marine, ibitego bya Apr Fc bikaba byatsinzwe na Kwitonda Alain Bacca ndetse na Ruboneka Jean Bosco, mu gihe igitego kimwe rukumbi cya Marine kikaba cyatsinzwe na Usabimana Olivier.
