Ikipe ya Fc Barcelona ibarizwa mu ntara ya Catalonia, yamaze guha ikaze ku mugaragaro umutoza mushya wayo Hansi Flick ukomoka mu gihugu cy’Ubudage.
Iyi kipe ibinyujije ku mbuga nkoranyambaga zayo, yanditse iha ikaze uyu mutoza wanyuze mu makipe arimo Bayern Munich ndetse n’ikipe y’igihugu y’Ubudage.
Uyu mutoza Hansi Flick akaba yerekeje mu ikipe ya FC Barcelona, aho aje gusimbura mugenzi we Xavi Hernandez wari umaze imyaka ibiri n’igice ayitoza, akaba yaratwaranye nayo ibikombe bibiri birimo Shampiyona ya la Liga ndetse na Super Cup ya Espagne.
Igenda ry’umutoza Xavi Hernandez wanakiniye iyi kipe, ryaratunguranye cyane nyuma yaho uyu mugabo yari yamaze kwemeranya n’ikipe ya Barcelona ko azayigumamo no mu mwaka utaha w’imikino ariko kubera amagambo yatangaje ku buyobozi bw’iyi kipe byatumye asezererwa.
Hansi Flick akaba aje muri iyi kipe isigaye idahagaze neza nkuko byahoze, kuko nubwo yageze muri 1/4 cy’imikino ya Uefa Champions League ndetse igasoza ku mwanya wa kabiri muri Shampiyona ya Espagne ariko isoje umwaka nta gikombe na kimwe yegukanye ndetse ikaba yaranatakaje igitinyiro yahoranye.
