Umukinnyi mpuzamahanga w’Umurundi Amissi Cedrick yamaze gutandukana n’ikipe ya Kiyovu Sports ku bwumvikane bw’impande zombi.
Iki cyemezo cyafashwe nyuma y’uko uyu mukinnyi yari yarahagaritswe by’agateganyo n’ubuyobozi bw’ikipe ya Kiyovu Sport kubera ibibazo by’imyitwarire itari myiza yagaragaje ndetse no kutubahiriza amategeko n’amabwiriza agenga iyi kipe.
Amissi Cedrick yongeye gukora amakosa ubwo yafata umwanzuro wo kujya iwabo mu gihugu cy’Uburundi nta ruhushya ndetse n’uburenganzira yahawe n’ubuyobozi bwa Kiyovu Sports ibintu byafashwe nk’agasuzuguro gakomeye ndetse no kutubaha ikipe muri rusange.
Nyuma y’ibiganiro byabaye hagati y’impande zombi, Ikipe ya Kiyovu Sports Club ndetse n’umukinnyi Amissi Cedrick bumvikanye ko icyaba cyiza ari ugusesa amasezerano mu mahoro ndetse buri ruhande rugakomeza inzira yarwo nta mananiza cyangwa amakimbirane abayeho.
Uyu mukinnyi Amissi Cedrick wakinnye mu bihugu bitandukanye ku migabane itandukanye, Asohotse mu ikipe ya Kiyovu Sport nta n’umwaka ayikiniye kuko yari yayigezemo mu mpeshyi y’umwaka ushize wa 2025.
