Mu mikino nyafurika ihuza abakozi ikomeje kubera mu gihugu cya Senegal mu murwa mukuru Dakar, amakipe ahagariye u Rwanda mu mupira w’amaguru ariyo Immigration ndetse na RMS yatangiye nabi.
Kuri uyu munsi tariki ya 19 Ukuboza 2024, nibwo amakipe ahagarariye u Rwanda mu mupira w’amaguru mu bagabo yamanukaga mu kibuga akina imikino yabo ya mbere mu irushanwa nyafurika rihuza abakozi gusa ntabwo babashije kubyitwaramo neza.
Ikipe ya Immigration ihagarariye u Rwanda yari yamanutse mu kibuga ikina n’ikipe yitwa IREF Tambacounda yo mu gihugu cya Senegal, aho uyu mukino waje kurangira IREF Tambacounda itsinze ikipe ya Immigration 1-0.
Indi kipe ihagarariye u Rwanda yarifite umukino ni RMS, ikaba yisobanuraga n’ikipe yitwa UCST PAD yo mu gihugu cya Senegal, uyu mukino ukaba warangiye ikipe ya RMS yo mu Rwanda inyagiwe ibitego 8-0 n’iyi kipe ya UCST PAD.
Aya makipe ahagarariye u Rwanda akaba azagaruka mu kibuga ku munsi w’ejo tariki ya 20 Ukuboza 2024, aho ikipe ya RMS (Rwanda Medical Supply) izaba ikina n’ikipe yitwa AS MEF yo mu gihugu cya Benin, Mu gihe ikipe ya Immigration ifite imikino ibiri ku munsi w’ejo, aho umukino wa mbere izawukina n’ikipe yitwa SENELEC yo muri Senegal ku isaha ya saa tatu za mu gitondo, Naho umukino wa kabiri ikaba izawukina n’ikipe yitwa CEVITAL yo muri Algerie ku isaha ya 17h30.
Mu mikino nyafurika iheruka gukinirwa mu gihugu cya Gambia, igikombe cyatwawe n’ikipe ya UCST PAD yo mu gihugu cya Senegal nyuma yo gutsinda ku mukino wa nyuma ikipe ya RBC yari ihagarariye u Rwanda.
