Jose Mourinho watozaga ikipe ya Tottenham Hotspurs yamaze kwirukanwa

Umutoza Jose Mourinho ukomoka mu gihugu cya Portugal wari usanzwe atoza ikipe ya Tottenham Hotspurs yo mu gihugu cy’ubwongereza, yamaze kwirukanwa niyi kipe kubera umusaruro utari mwiza.

Jose Mourinho w’imyaka 58 wageze mu ikipe ya Tottenham Hotspurs mu mwaka wa 2019 nyuma yo kwirukana kwa Mouricio Pochetino, nawe yamaze kwirukanwa nyuma y’amezi 17 gusa atoza iyi kipe aho ashinjwa umusaruro mucye ndetse no kudafasha ikipe kugera ku ntego biyemeje.

Uyu mutoza yirukanwe nyuma yaho muri iyi weekend ananiwe gutsinda umukino ikipe ya Tottenham yari yakinnyemo n’ikipe ya Everton umukino waje kurangira amakipe yombi anganya ibitego 2-2, ikindi Mourinho yananiwe gufasha iyi kipe gukomeza mu mikino ya Europa League ndetse akaba asize iyi kipe ihagaze ku mwanya 7 n’amanota 50 muri shampiyona y’Ubwongereza (Premier League).

Umutoza Jose Mourinho yatoje ikipe ya Tottenham imikino 86 mu marushanwa yose aho yatsinzemo imikino 45, anganya imikino 24 ndetse atsindwa imikino igera kuri 17, uyu mugabo mbere yo kwerekeza mu ikipe ya Tottenham Hotspurs yanyuze mu makipe atandukanye arimo ikipe ya Chelsea, Manchester United, Real Madrid, Benfica, Inter Milan ndetse n’ikipe ya FC Porto.