Nyuma yo gutsinda igitego akambara nkuko yavutse yamaze guhanishwa imikino 8 adakina
Mu gihugu cya Brazil haravugwa amakuru y’umukinnyi witwa Emerson Carioca wahanwe n’ishyirahamwe ry’umupira w’amaguru muri kiriya gihugu, kubera ukuntu yishimiye igitego yari amaze gutsinda maze agahita akuramo imyenda yose.
Uyu mukinnyi usanzwe akinira ikipe ya Sampaio Correa mu gihugu cya Brazil, nyuma yibyo yakoze yishimira igitego yamaze guhanishwa guhagarikwa imikino igera ku munani adakina bitewe n’imyitwarire yagaragaje itarishimwe n’ishyirahamwe ry’umupira w’amaguru muri kiriya gihugu.
Emerson Carioca w’imyaka 25 y’amavuko usanzwe akina asatira aca ku mpande yakoze kiriya gikorwa ubwo yatsindaga igitego ku mukino bakinagamo n’ikipe ya Marica, maze bihita bibafasha kuzamuka muri Carioca Championship.
Emerson akimara gutsinda igitego cy’itsinzi yahise yirukanka ajya kwishimira icyo gitego imbere y’abakinnyi ndetse n’abatoza b’ikipe ya Marica, ahita akuramo imyenda yose maze yereka abakinnyi n’abatoza ba Marica ikibuno cye ndetse n’igitsina ibintu byahise binateza ubushyamirane hagati y’amakipe yombi.
Ibi rero bikaba bitarakiriwe neza n’abashinzwe imyitwarire bahita bafata umwanzuro wo kumuhagarika imikino 8 adakina, bamushinja kwitwara nabi ndetse no kutihesha agaciro ngo anagaheshe ikipe ye ya Sampaio asanzwe akinira, gusa nyuma y’ibyo yakoze akaba yarahise asaba imbabazi abakunzi b’umupira w’amaguru mu gihugu cya Brazil muri rusange.
