Rutahizamu w’ikipe ya Paris Saint-Germain Ousmane Dembele ndetse na Aitana Bonmati ukinira ikipe ya Fc Barcelona begukanye Ballon D’Or ya 2025 mu bagabo n’abagore.
Mu gihugu cy’Ubufaransa mu mujyi wa Paris habereye ibirori bikomeye byo gutanga ibihembo bya Ballon d’Or ya 2025, aho abakinnyi, abatoza ndetse n’amakipe bitwaye neza mu mwaka w’imikino ushize bahembwe.
Umufaransa Ousmane Dembele ukinira ikipe ya Paris Saint-Germain (PSG) niwe wegukanye igihembo cy’umukinnyi mwiza mu bagabo (Ballon d’Or 2025). Dembélé yabigezeho nyuma yo gufasha ikipe ya PSG kuba ikipe ya mbere yo mu gihugu cy’Ubufaransa yegukanye ibikombe bitatu bikomeye (treble) harimo igikombe cya shampiyona y’Ubufaransa (Ligue 1) igikombe cy’igihugu (Coupe de France) ndetse na UEFA Champions League mu mwaka w’imikino ushize.
Dembele akaba yegukanye igihembo cya Ballon d’Or ya 2025 ahigitse rutahizamu w’imyaka 18 ukinira ikipe ya FC Barcelona n’ikipe y’igihugu ya Espagne, Lamine Yamal bari bahataniye iki gihembo cyane kurusha abandi bose.
Ku rundi ruhande umunya-Espagne Aitana Bonmati ukinira ikipe ya FC Barcelona yongeye kugaragaza ubudahangarwa bwe yegukana Ballon d’Or ya 2025 mu bagore ku nshuro ya gatatu yikurikiranya.
Ibi yabigezeho ahigitse mugenzi we ukinira ikipe ya Arsenal ndetse n’ikipe y’igihugu ya Espagne, Mariona Caldentey wari mu bakandida ba nyuma ndetse banahabwaga amahirwe menshi yo kwegukana iki gihembo kubera ko yatwaranye n’ikipe ya Arsenal irushanwa rya UEFA Champions League. Bonmatí akomeje kwandika amateka nk’umwe mu bakinnyi b’igitsina gore bakomeye cyane ku isi muri iki gihe.
Ibindi byiciro byihariye byatanzwemo ibihembo:
-
-
Abakinnyi bakiri bato beza (Young players) bahawe igihembo cya Kopa Trophy: Vicky López mu bakobwa ndetse na Lamine Yamal mu bagabo bose bakinira ikipe ya FC Barcelona
-
Abatoza beza (Best coaches): Sarina Wiegman utoza ikipe y’igihugu y’Ubwongereza mu bagore ndetse na Luis Enrique (abagabo) isanzwe atoza ikipe ya PSG.
-
Abanyezamu beza (Best goalkeepers): Hannah Hampton ukinira ikipe ya Chelsea mu bagore ndetse Gianluigi Donnarumma uheruka kwerekeza mu ikipe ya Manchester City avuye mu ikipe ya PSG.
-
Ba rutahizamu beza (Top scorers) bahawe igihembo cya Gerd Muller: Ni Ewa Pajor (abagore) usanzwe akinira ikipe ya Barcelona ndetse na Viktor Gyökeres (abagabo) usanzwe akinira ikipe ya Arsenal.
-
. Ikipe y’abagore y’umwaka (Women’s club): Yabaye ikipe ya Arsenal WFC kubera kwegukana irushanwa rya Uefa Champions League.
-
Ikipe y’abagabo y’umwaka (Men’s club): Yabaye ikipe ya Paris Saint-Germain (PSG) nyuma yo kwegukana ibikombe bitatu bikomeye (Treble)
Ibihembo bya Ballon d’Or 2025 byongeye kugaragaza uko umupira w’amaguru ukomeje kuzamura impano nshya kandi nyinshi ndetse n’uburyo amakipe akomeye ku mugabane w’iburayi akomeje kugenda ahatana cyane mu buryo bukomeye.
