Premier league yashyizweho akadomo Chelsea na Manchester united zisoza muri enye za mbere
Nyuma y’umukino w’umunsi wanyuma, Shampiyona y’igihugu y’abongereza premier league yamaze gushyirwaho akadomo, igikombe cyikaba cyaregukanwe n’ikipe ya Liverpool yari imaze imyaka igera kuri 30 idatwara shampiyona.
Imikino y’umunsi wanyuma yakinwe hibazwa byinshi ku makipe agomba kumanuka mu cyiciro cya kabiri, ndetse no ku makipe yarwaniraga kuboneka muri enye za mbere, maze agahita abona itike yo kuzakina imikino y’amakipe yabaye aya mbere iwayo ku mugabane w’iburayi izwi nka champions league.
Ikipe ya Chelsea yabonye iyi tike nyuma yo gutsinda ikipe ya Wolves ibitego bibiri ku busa, byatsinzwe na Mason Mount ndetse Olivier Giroud, ikaba yahise isoza shampiyona yicaye ku mwanya wa kane n’amanota 66 izigamye ibitego bigera kuri 15.
Naho ikipe ya Manchester united yasoje shampiyona iri ku mwanya wa gatatu n’amanota 66 ikaba yari izigamye ibitego bigera kuri 30, ni nyuma yo gutsinda ku mukino w’umunsi wa nyuma ikipe ya Leicester city, bari bahanganiye kujya muri enye za mbere ibitego 2 ku busa, ibi bikaba byatumye ihita ibona itike yo kuzakina champions league umwaka utaha.
Andi makipe akomeye nka Arsenal yasoje shampiyona yiyicariye ku mwanya wa 8 n’amanota 56, ibi bikaba bizatuma idakina imikino yo ku mugabane w’iburayi, keretse mu gihe yaba itsinze ikipe ya Chelsea bazahuramo ku mukino wa nyuma wa FA Cup ikegukana igikombe. Naho ikipe ya Totenham ikaba yasoje ku mwanya wa 6 n’amanota 59 bivuzeko izakina imikino ya Europa League umwaka utaha.
Amakipe yamaze kumanuka mu cyiciro cya kabiri, harimo ikipe ya Watford yananiwe gutsinda ikipe ya Arsenal ngo biyifashe kuguma mu cyiciro cya mbere, AFS Boumemouth ndetse n’ikipe ya Norwich city. shampiyona y’umwaka utaha 2020-2021 ikaba izatangira kuwa 12 Nzeri 2020, ikarangira tariki ya 23 Gicurasi 2021.
