Mu mukino utari woroshye n’agato ku mpande zombi, ikipe ya RBC yabonye intsinzi imbere y’ikipe ya RBA.
Ni umukino wabaye kuwa gatanu tariki ya 19 Mata 2024, ukaba warabereye kuri Stade ya Mumena i Nyamirambo, Aho waje kurangira ikipe ya RBC itsinze RBA ibitego 2 ku busa, mbere y’uyu mukino hafashwe umunota wo Kwibuka Abatutsi barenga miliyoni bazize Genocide mu 1994.
Uyu mukino ukaba waratangiye ubona buri kipe yose ishakisha uko yakwinjira mu mukino mbere yindi, aho wabonaga ikipe ya RBA icungira kuri Contre-attaque mu gihe ikipe ya RBC yageragezaga guhererekanya cyane ishaka uko yagera imbere y’izamu.
Nubwo ibi byose byabaga ariko kubona igitego byaragoranye cyane ku mpande zombi ndetse igice cya mbere kinarangira nta kipe n’imwe ibashije kureba mu izamu ryindi.
Mu gice cya kabiri abatoza bombi yaba Hakizimana Patrick utoza ikipe ya RBC ndetse na Kwizigira Jean Claude utoza ikipe ya RBA, bakoze impinduka zitandukanye mu bakinnyi babo bashakisha uko babona intsinzi.
Izi mpinduka zakorwaga n’abatoza zaje gutanga umusaruro ku ruhande rw’ikipe ya RBC kuko yaje kubona ibitego bibiri byatsinzwe na kapiteni Neza Anderson ndetse na Mugisha Yvan wari winjiye mu kibuga asimbuye Safari Hussein.
Nyuma y’uyu mukino, umutoza w’ikipe ya RBA, Kwizigira Jean Claude, yatangaje ko nubwo batakaje umukino ubanza wa 1/2 kirangiza mu gikombe cy’umurimo ariko yanenze imisifurire yaranzwe mu mukino gusa akaba yasoje avuga ko azihorera mu mukino wo kwishyura ndetse agomba gusezerera ikipe ya RBC byanze bikunze.
Hakizimana Patrick utoza ikipe ya RBC, yashimiye abakinnyi bose uko bitwaye mu mukino yaba ababanje mu kibuga ndetse n’abasimbuye, akaba yakomeje asaba buriwese kumva ko urugamba rwo kwisubiza iki gikombe rugikomeje ndetse ababwira ko bagomba no kuzitwara neza mu mukino wo kwishyura.
Undi mukino wabaye kuwa gatanu muri 1/2 mu gikombe cy’umurimo, ikipe ya Immigration yanganyije n’umujyi wa Kigali ubusa ku busa, akaba ari umukino ubanza wari wabereye kuri Stade ya Bugesera.
Imikino ya 1/2 yo kwishyura, ikaba iteganijwe kuzaba kuwa gatanu utaha tariki ya 26 Mata 2024, RBA yakira RBC mu gihe ikipe y’umujyi wa Kigali izaba yakiriye Immigration, amakipe azakomeza akaba azahurira ku mukino wa nyuma tariki ya 1 z’ukwezi kwa gatanu ku munsi w’umurimo.
