Ruben Dias ukinira Manchester City yatowe nk’umukinnyi w’umwaka muri Premier League
Ishyirahamwe ry’abanyamakuru ba ruhago bandika mu gihugu cy’Ubwongereza, bamaze gutora Ruben Dias myugariro ukomoka mu gihugu cya Portugal usanzwe akinira ikipe ya Manchester City nk’umukinnyi w’umwaka muri Premier League.
Iri shyirahamwe ry’abanyamakuru bandika risanzwe ritanga ibihembo bise Football Writers’ Association Footballer of the Year, aho ogihembo cy’uyu mwaka wa 2020-2021 cyamaze kwegukanwa na myugariro Ruben Dias ukinira Manchester City nyuma yo guhigika abakinnyi bagera ku 9 bari bahanganye barimo na Rutahizamu w’Umwongereza Harry Kane.
Ruben Dias ni myugariro ukomeje kwitwara neza kuko yarabigaragaje cyane muri uyu mwaka w’imikino wa 2020-2021, aho yafashije cyane ikipe asanzwe akinira ya Manchester City kwegukana igikombe cya shampiyona hamwe n’igikombe cya Carabao Cup, ntabwo ari ibyo gusa kuko iyi kipe ifite n’itike yo gukina umukino wa nyuma wa UEFA Champions League aho izakina n’ikipe ya Chelsea kandi uyu myugariro ni umwe mu bafashije cyane iyi kipe ya Manchester City cyane.
Uyu myugariro Ruben Dias yageze mu ikipe ya Manchester City umwaka ushize w’imikino avuye mu gihugu cya Portugal mu ikipe ya Benifica Lisbon, akaba yaratanzweho akayabo k’amafaranga na miliyoni 68 z’amayero.
Ruben Dias yahise aba myugariro wa mbere utwaye iki gihembo cy’Umukinnyi mwiza w’umwaka muri Premier League atowe n’abanyamakuru bandika imikino nyuma y’uko undi myugariro waherukaga kucyegukana yagitwaye mu 1989 shampiyona itari yitwa Premier League akaba ari uwitwa Steve Nicol.
