Rutahizamu Zlatan Ibrahomovic yongereye amasezereno y’umwaka umwe mu ikipe ya AC Milan
Rutahizamu Zlatan Ibrahimovic w’imyaka 39 y’amavuko ukomoka mu gihugu cya Sweden, yamaze kongera amasezerano y’umwaka umwe mu ikipe ya AC Milan asanzwe akinira.
Mu byatumye Zlatan Ibrahimovic yongererwa amasezerano ni uburyo akomeje gufasha cyane ikipe ya AC Milan mu mikino ya shampiyona y’icyiciro cya mbere mu gihugu cy’Ubutaliyani, aho kugeza ubungubu amaze gutsindira iyi kipe ibitego 17 mu mikino igera kuri 25 amaze gukinira iyi kipe ibarizwa mu mujyi wa Milan.
Nyuma yo kongera amasezerano y’umwaka umwe mu ikipe ya AC Milan, rutahizamu Zlatan Ibrahimovic yatangaje ko yishimye cyane kongera aya masezerano kuko mu ikipe ya AC Milan ahafata nko mu rugo.
Yagize ati” Ndishimye cyane kuba nongereye amasezerano y’umwaka umwe mu ikipe yanjye AC Milan, gukina hano biranshimisha cyane kuko muri iyi kipe mpafata nko rugo bitewe nuko abantu bose banyitaho nanjye kandi mbitaho cyane”.
Uyu mugabo Zlatan Ibrahimovic ku myaka 39 uheruka kugaruka mu ikipe y’igihugu ya Sweden nyuma y’uko yari yarasezemo, amaze kunyura mu makipe menshi atandukanye harimo ikipe ya Malmo FF, Ajax Amsterdam yo mu Buholandi, Juventus, Inter Milan, Barcelone, AC Milan, Paris St Germain, Manchester United, Los Angeles Galaxy yo muri Amerika ndetse n’ikipe ya AC Milan yagarutsemo.
