Ubwandu bwinshi bwa Covid-19 bwagaragaye mu ikipe ya AS Muhanga
Ikipe ya AS Muhanga isanzwe ibarizwa mu Karere ka Muhanga mu ntara y’amajyepfo, yagaragayemo ubwandu bwinshi bw’icyorezo cya Coronavirus aho abakinnyi 10 ndetse n’abafasha b’abatoza 2 bapimwe bagasangwamo iki cyorezo.
Ibi byagaragaye kuri iki cyumweru tariki ya 25 Mata 2021 mu bipimo by’icyorezo cya Coronavirus byafashwe abakinnyi bose ndetse na staff yose y’ikipe ya AS Muhanga mbere y’umukino wa gicuti wagombaga kubahuza n’ikipe ya Sunrise Fc yo mu karere ka Nyagatare, ni umukino wagombaga kubera kuri Stade Regional ya Muhanga.
Nyuma y’uko ubu bwandu bw’icyorezo cya Coronavirus bugaragaye mu ikipe ya AS Muhanga ku bakinnyi icumi ndetse n’abafasha b’abatoza babiri, umukino wa gicuti iyi kipe yagombaga gukina n’ikipe ya Sunrise Fc mu karere ka Muhanga wahise uvanwaho ndetse abasanzwemo icyorezo cya Coronavirus bahita bashyirwa mu kato kugirango babashe kwitabwaho.
Ni umukino wa gicuti ikipe ya AS Muhanga yari yiteguye mu rwego rwo gukomeza kwitegura shampiyona y’icyiciro cya mbere izatangira tariki ya 1 Gicurasi 2021 ikaba izakinwa mu matsinda, iyi kipe yo mu majyepfo ikaba iherereye mu itsinda rya mbere aho iri kumwe n’ikipe ya APR FC, Bugesera Fc ndetse n’ikipe ya Gorilla Fc, umukino wa mbere AS Muhanga izasura ikipe ya Bugesera Fc tariki ya 1 Gicurasi 2021 umukino uzabera kuri Stade y’akarere ka Bugesera.
