Uganda: Umugabo ukomoka muri Amerika yatawe muri yombi na Polisi ashinjwa kubangamira ubutegetsi
Mu gihugu cya Uganda haravugwa inkuru y’itabwa muri yombi ry’umugabo ukomoka muri Leta z’Unze Ubumwe z’Amerika, wafunzwe na Polisi ashinjwa kugaragara mu bikorwa bitandukanye byo kurwanya ubutegetsi bwa Perezida Museveni.
Uyu mugabo ukomoka muri Amerika witwa Guy Smith yatawe muri yombi na Polisi kuri iki cyumweru tariki ya 23 Werurwe 2021 mu mujyi wa Fort Portal mu gice cy’Iburengerazuba bwa Uganda, nkuko amakuru abigaragaza yatangajwe ku mbuga nkoranyambaga za polisi ya Uganda.
Guy Smith nyuma yo gufatwa nta kintu na kimwe yari yatangaza ku bijyanye nibyo ashinjwa byo kubangamira ubutegetsi bwa Perezida Yoweli Kaguta Museveni, Polisi ikaba ivuga ko uriya mugabo Guy Smith azakomeza gufungwa mu gihe bakirimo gukora iperereza ku byaha ashinjwa.
Umuyobozi mu biro bishinzwe ububanyi n’amahanga bw’Amerika, yatagaje ko leta y’Amerika yamenye amakuru y’itabwa muri yombi ry’umuturage wabo ndetse barakomeza gukurikira ibye nkuko Reuters ibitangaza.
Yagize ati” Amakuru y’itabwa muri yombi ry’umuturage wacu mu gihugu cya Uganda twarayabonye kandi duhora twiteguye gufasha abaturage bacu aho bari hose mu gihe bahuye n’ibibazo runaka”.
