Umutoza Zinedine Zidane yavuze ko atazi niba Myugariro Sergio Ramos azaguma mu ikipe yabo
Umutoza w’ikipe ya Real Madrid Zinedine Zidane, yatangarije ibinyamakuru byo mu gihugu cya Espagne ko atazi neza niba Myugariro Sergio Ramos azongera amasezerano mu ikipe abereye umutoza.
Ibi umutoza Zinedine Zidane yabitangaje nyuma yuko amasezerano ya myugariro Sergio Ramos w’imyaka 34, azarangirana n’impera y’uyu mwaka w’imikino wa 2020-2021.
Zidane yabwiye ibinyamakuru ko atazi neza niba Kapiteni Sergio Ramos azaguma mu ikipe ya Real Madrid kuko nta kintu bari baganira ku bijyanye no kongera amasezerano, ariko uyu mutoza akaba yavuze ko yifuza ko uyu mukinnyi ahaguma.
Zidane yagize ati“Ntababeshye ntabwo mbizi neza niba Kapiteni wacu Ramos azaguma mu ikipe yacu ya Real Madrid kuko nta kintu na kimwe twari twaganira ku bijyanye no kuba azongera amasezerano, gusa ndifuza ko yaguma hano kuko turacyamukeneye cyane hano kuko aradufasha cyane”.
Myugariro Sergio Ramos kuva yagera mu ikipe ya Real Madrid mu mwaka wa 2005 avuye mu ikipe ya Seville, amaze gukinira iyi kipe imikino 668 aho yatsinzemo ibitego bigera ku 100, akaba amaze gutwarana n’iyi kipe ibikombe bine bya Champions League, ibikombe by’isi bine by’ama-club ndetse n’ibikombe bitanu bya shampiyona ya Espagne La Liga.
