Abakinnyi ba Simba SC bongeye kwemererwa agahimbazamusyi gatubutse n’umuherwe wabo
Abakinnyi b’ikipe ya Simba SC yo mu gihugu cya Tanzaniya bongeye kwemererwa agahimbazamusyi gatubutse n’umuherwe wabo Muhamed Dewji bakunze gutazira akazina ka Mo, mu gihe baba babashije gutsinda ikipe ya As Vita Club mu mikino ya CAF Champions League.
Nkuko ibitangazamakuru byo mu gihugu cya Tanzaniya bikomeje kubivuga, abakinnyi b’ikipe ya Simba SC bamaze kwemererwa n’umuherwe wabo Muhamed Dewji amafaranga angana na Miliyoni 600 z’amashilingi ya Tanzaniya nibaramuka batsinze ikipe ya Vita Club bafitanye umukino kuri uyu munsi tariki ya 3 Mata 2021 kuri Benjamin Mkapa Stadium muri Tanzaniya.
Akaba ari umukino wo kwishyura aya makipe yombi agiye gukina kuko umukino ubanza wabereye mu gihugu cya Congo Kinshasa wari warangiye ikipe ya Simba SC itsinze ikipe ya As Vita Club igitego kimwe k’ubusa, ni umukino uraza gutangira Saa cyenda z’amanywa ku isaha yo mu Rwanda, bikaza kuba ari ku isaha ya Saa kumi z’amanywa zomuri Tanzania ndetse CAF ikaba yaremereye ikipe ya Simba abafana barenga ibihumbi 10 kwinjira kuri uriya mukino.
Ikipe ya Simba SC ikaba iherereye mu itsinda rya mbere aho iri kumwe n’ikipe ya As Vita Club yo muri Congo Kinshasa baza gukina uyu munsi, hakaza ikipe ya Al Ahly yo mu gihugu cya Misiri ndetse n’ikipe ya Al Merrikh yo mu gihugu cya Sudani, iri tsinda rikaba rikomeje kuyoborwa n’ikipe ya Simba SC n’amanota 10 mu mikino ine bamaze gukina.
