Amavubi yamaze gutegurirwa imikino ya gicuti mbere yo kwerekeza mu mikino ya CHAN
Mu kwezi gutaha tariki ya 16 Mutarama , mu gihugu cya Cameroon hateganijwe kubera igikombe cya Afurika cy’ibihugu mu bakinnyi bakina imbere mu bihugu byabo (CHAN), irushanwa ryakabaye ryarabaye muri uyu mwaka tugiye gusoza wa 2020, ariko bitewe n’icyorezo cya coronavirus rikaba ryaraje gusubikwa ryimurirwa mu mwaka wa 2021.
Ikipe y’igihugu Amavubi n’imwe mu makipe yabonye itike yo kuzitabira iyi mikino, aho yasezereye ikipe y’igihugu ya Etiyopiya, kuri ubu rero ikaba yaramaze no gutangira imyitozo aho umutoza wayo Mashami Vicent yahamagaye abakinnyi bagera kuri 31 ndetse n’abandi batatu bashyizwe kuri lisiti yo gutegereza(Waiting list), bikaba binavugwako ikipe izatwara abakinnyi bagera kuri 30, kubera icyorezo cya coronavirus.
Ferwafa ikaba yamaze gutangaza ko hateguwe imikino ya Gishuti izafasha abasore b’Amavubi kwitegura neza iyi mikino ya CHAN, bikaba biteganijwe ko tariki ya 07 Mutarama 2021 ikipe y’igihugu Amavubi izakina n’ikipe y’igihugu ya Namibia, hanyuma tariki ya 10 Mutarama 2021 Amavubi akazakina n’ikipe y’igihugu ya Congo Brazaville, imikino yose ikazabera kuri Stade Amahoro i Remera.
