Atletico Madrid niyo yegukanye igikombe cya shampiyona ya Espagne la liga 2020-2021
Ikipe ya Atletico Madrid niyo yegukanye igikombe cya shampiyona y’icyiciro cya mbere (La liga) mu gihugu cya Espagne, ni nyuma yo guhigika amakipe bari bahanganye cyane ariyo Real Madrid ndetse n’ikipe ya Fc Barcelona.
Iyi kipe isanzwe ibarizwa mu murwa mukuru w’igihugu cya Espagne ariwo Madrid, yegukanye igikombe cya shampiyona ya La liga ku nshuro yayo ya 11 kuko igikombe cya shampiyona yaherukaga kucyegukana mu mwaka w’imikino wa 2013-2014, none yongeye kugitwara muri uyu mwaka w’imikino 2020-2021 umaze gushyirwaho akadomo.
Atletico Madrid y’umutoza Diego Simeone ntabwo yari yizeye neza ko iza kwegukana igikombe cya shampiyona ya la liga kuko mucyeba wayo Real Madrid nayo yari igifite amahirwe yo kuba yakwegukana igikombe mu gihe yari gutsinda umukino yakinaga na Villarreal naho ikipe ya Atletico Madrid ikaba yari gutakaza umukino yakinagamo n’ikipe ya Real Valladolid, gusa ntabwo byaje gukunda kuko ikipe ya Atletico Madrid yasoje umukino wa nyuma wa shampiyona itsinze ikipe ya Real Valladolid ibitego 2-1.
Shampiyona ya Espagne la liga muri uyu mwaka w’imikino ikaba irangiye ikipe ya Atletico Madrid iri ku mwanya wa mbere n’amanota 86, aho yakurikiwe n’ikipe ya Real Madrid yasoje ku mwanya wa kabiri n’amanota 84, ikipe ya Fc Barcelona yasoje ku mwanya wa gatatu n’amanota 79, naho ikipe ya Fc Seville ikaba iri ku mwanya wa kane n’amanota 74 gusa ikaba igifite umukino itari yakina bivuze ko ishobora gusoza shampiyona ifite amanota 78 igihe yaramuka itsinze ikipe ya Alaves bazakina tariki ya 23 Gicurasi 2021.
