Igihe shampiyona y’umupira w’amaguru mu Rwanda izasubukurirwa cyamaze kumenyekana
Ishyirahamwe ry’umupira w’amaguru mu Rwanda(FERWAFA), ryamaze kwemeza ko shampiyona y’icyiciro cya mbere mu Rwanda izasubukurwa tariki ya 15 Mata 2021 nyuma y’igihe kinini yari imaze yaragaritswe kubera icyorezo cya Coronavirus.
Nkuko Ishyirahamwe ry’umupira w’amaguru mu Rwanda FERWAFA ryabitangaje, shampiyona igiye gusubukurwa ariko ikazakinwa mu buryo bw’amatsinda mu rwego rwo korohereza amakipe ndetse no kugirango shampiyona izarangire vuba haboneke n’amakipe azahagararira igihugu mu mikino nyafurika yaba CAF Champions League ndetse CAF Confederations Cup.
Bikaba bivugwa ko ikipe ya APR FC, Rayon Sport, Mukura VS ndetse na Police FC arizo zishobora kuzayobora amatsinda ane hatagize igihinduka, hanyuma amakipe azaba ari mu itsinda rimwe azajya ahura hagati yayo, ebyiri za mbere mu itsinda zizahita zibona itike ya ¼ mu gihe amakipe azagera ku mukino wa nyuma ari yo azahita abona itike yo kuzahagararira igihugu mu mikino ya CAF Champions League ndetse na Confederation Cup umwaka w’imikino wa 2021-2022.
Mu gihe shampiyona yaba igarutse tariki ya 15 Mata 2021 ndetse igakinwa mu buryo bw’amatsinda, biteganijwe ko yazamara igihe kingana n’ukwezi n’igice ubwo bikaba byumvikana neza ko yazasozwa mu kwezi kwa Gatandatu uyu mwaka, ibi bikaba bije nyuma y’uko Minisiteri ya siporo itanze uburenganzira ku makipe ko ashobora gutangira imyitozo ariko babanje gusaba uruhushya.
