Ikipe ya Juventus ngo yiteguye kurekura umukinnyi wayo Aaron Ramsey
Nkuko ikinyamakuru Sky Italia cyabitangaje, ikipe ya Juventus ngo yiteguye kugurisha umukinnyi wayo wo hagati mu kibuga Aaron Ramsey, kuko umutoza mushya w’iyi kipe atamufite mu mibare ye umwaka utaha.
Aaron Ramsey ukomoka muri Wales, yageze mu ikipe ya Juventus avuye mu ikipe ya Arsenal yo mu gihugu cy’Ubwongereza yari amazemo imyaka myinshi, ndetse akaba yari umwe mu bakinnyi bari ngenderwaho muri iriya kipe ya Arsenal, dore ko yari yaremerewe kugirwa Kapiteni wayo mu gihe yari kwemera kuhaguma, ariko ntabwo byakunze kuko yahisemo kwereza mu gihugu cy’Ubutaliyani mu ikipe ya Juventus.
Nyuma yaho ikipe ya Juventus isezerewe mu mikino ya UEFA Champions league, igahita yirukana Mourizio Sari wari uyibereye umutoza, ndetse igahita inasinyisha Andrea Pirlo nk’umutoza mushya w’iyi kipe, kuri ubu uyu mutoza yavuzeko atifuza Ramsey mu ikipe azakoresha mu mwaka utaha w’imikino 2020-2021.
Bikaba bikomeje kwibazwa aho uyu musore ukomoka muri Wales azerekeza umwaka utaha w’imikino, kuko ni umukinnyi mwiza wo mu kibuga hagati ndetse utatinya no kuvuga ko ikipe ya Juventus yari yamuguze imukeneye cyane nubwo kubona umwanya ubanza mu kibuga bitari byoroshye na gato bitewe n’abakinnyi bakina ku mwanya we bari bahari.
Hari abandi bakinnyi bivugwa ko bashobora gusohoka mu ikipe ya Juventus, barimo Gonzalo Higuain, Sami Khedira ndetse na Blaise Matuidi ushobora kwerekeza mu ikipe Inter Miami yo muri Leta Z’unze Ubumwe za Amerika ikaba iya David Beckham wakanyujije mu mupira w’amaguru.
