Muhire Kevin na Rwatubyaye Abdul bangiwe kuza gukinira Amavubi
Rwatubyaye Abdul myugariro w’ikipe y’igihugu Amavubi ndetse n’ikipe ya FK Shkupi muri Macedonia hamwe n’umukinnyi wo hagati mu kibuga Muhire Kevin ukinira ikipe ya Sahama Club mu gihugu cya Oman, amakipe yabo yanze ko bitabira ubutumire bw’Ikipe y’igihugu Amavubi.
Ibi bibaye nyuma yuko bari bahamagawe n’umutoza w’ikipe y’igihugu Amavubi Mashami Vincent ngo baze kwitegura imikino ibiri u Rwanda ruzakina n’ikipe y’igihugu ya Mozambique ndetse n’ikipe y’igihugu ya Cameroon mu mikino yo gushaka itike y’igikombe cy’Afurika iteganijwe kubera mu gihugu cya Cameroon.
Nkuko Ishyirahamwe ry’umupira w’amaguru mu Rwanda (Ferwafa) ryabitangaje, ryavuze ko amakipe bariya bakinnyi basanzwe bakinira yanze bitabira ubutumire bari bahawe bwo kuza gukinira Amavubi kubera ingamba zo kwirinda icyorezo cya Coronavirus, gusa Ferwafa ikaba yongeye kubasaba ndetse ikaba itegereje guhabwa igisubizo.
Ubundi byari bisanzwe ari itegeko ko amakipe agomba kurekura abakinnyi bahamagawe mu makipe yabo y’ibihugu bakajya kubikinira mu mikino mpuzamahanga byabaga bifite nkuko FIFA yabitegekaga gusa ariko ubu sntabwo ariko bimeze kuko Ishyirahamwe ry’Umupira w’Amaguru ku Isi (FIFA) ryemereye amakipe abishaka kutazarekura abakinnyi bayo ngo bitabire imikino mpuzamahanga y’ibihugu kubera impamvu za Coronavirus.
Ikipe y’igihugu Amavubi imaze icyumweru yitegura imikino ibiri ifite harimo uwo izakina tariki ya 24 z’uku kwezi na Mozambique i Kigali ndetse nundi mukino ifitanye n’ikipe y’igihugu ya Cameroon tariki ya 31 Werurwe 2021 umukino uzabera mu gihugu cya Cameroon.
