Myugariro ukomoka mu gihugu cya Uruguay Ronald Araujo, yamaze kongera amasezerano mu ikipe ya Fc Barcelona azamugeza mu mwaka wa 2031.
Uyu myugariro akaba yashyize umukono ku masezerano mashya uyu munsi tariki ya 23 Mutarama 2025 nyuma yaho hagiye havugwa amakuru menshi atandukanye yasohoraga uyu mukinnyi muri iyi kipe ibarizwa mu ntara ya Catalonia.
Ronald Araujo asanzwe ari umwe mu bayobozi b’abakinnyi (Captain) mu ikipe ya Fc Barcelona, akaba yarageze muri iyi kipe mu mwaka wa 2018 avuye mu ikipe ya Boston River, Montevideo gusa akihagera akaba yarahereye mu ikipe ya Barcelona B mbere y’uko azamurwa mu ikipe nkuru ndetse umukino wa mbere mu ikipe nkuru akaba yarawukinnye tariki ya 6 Ukwakira 20219 ubwo Barcelona yakinaga n’ikipe ya Sevilla.
Uyu mukinnyi ni umwe mu bagira ishyaka ryinshi cyane mu kibuga ndetse n’ubuhanga bwinshi mu bijyanye no kugarira izamu bituma ashyirwa muri ba myugariro beza isi ifite kugeza ubu, dore ko ari n’umukinnyi ushobora gukina ku ruhande rw’iburyo yugarira kandi akabikora neza.
Kuva yagera mu ikipe ya Fc Barcelona, Ronald Araujo akaba amaze kuyikinira imikino 154, aho yatsinze ibitego 8 anatanga imipira ibyara ibitego igera kuri 6 ndetse akaba amaze gutwarana n’iyi kipe ibikombe birimo shampiyona ya Espagne (La liga), Copa del Rey, Super Cup ya Espagne ndetse n’ibindi.
