Saido Berahino ntazitabira imikino y’ikipe y’igihugu nyuma y’uko yanduye icyorezo cya Covid-19
Rutahizamu Saido Berahino ukomoka mu gihugu cy’u Burundi ntabwo azitabira imikino y’ikipe y’igihugu cye asanzwe anabereye kapiteni nyuma y’uko bamusanzemo icyorezo cya Coronavirus.
Nkuko byatangajwe n’ikipe ya Charleroi Sporting Club Saido Berahino asanzwe akinira, bavuze ko uyu mukinnyi n’abagenzi batanu bakinana hamwe n’abakozi batanu bayo bamaze gusangwamo icyorezo cya Coronavirus ndetse bakaba bamaze gushyirwa mu kato kazamara ibyumweru bibiri.
Nyuma yiri tangazo ryashyizwe hanze niriya kipe, abashinzwe ikipe y’igihugu y’u Burundi bahise batangaza ko rutahizamu wabo Saido Berahino atazitabira imikino ibiri ikipe yabo Intamba mu rugamba irimo kwitegura kuzakina n’ikipe y’igihugu ya Centrafrique tariki ya 26 Werurwe 2021 ndetse nundi mukino bafitanye na Maroc tariki ya 30 Werurwe 2021.
Charleroi Sporting Club ya Rutahizamu Saido Berahino isanzwe ikina shampiyona y’icyiciro cya mbere mu gihugu cy’Ububirigi , kugeza ubu ikaba ihagaze ku mwanya wa munani muri iriya shampiyona, Berahino akaba yarayigezemo atijwe na Zulte Waregen nayo yo mu gihugu cy’Ububurigi ariko akaba yarananyuze mu makipe nka West Bromwich Albion na Stoke City zo mu Bwongereza.
