Umukinnyi wo hagati mu kibuga Muhire Kevin yamaze gusinyira Rayon Sport
Umukinnyi w’ikipe y’igihugu Amavubi Muhire Kevin usanzwe ukina mu kibuga hagati, yamaze gusinyira ikipe ya Rayon Sport igihe kingana n’amezi abiri.
Uyu mukinnyi Muhire Kevin yari amaze iminsi akina mu gihugu cya Oman muri shampiyona y’icyiciro cya mbere mu ikipe yitwa Sahama Club, gusa kugeza ubu shampiyona yo muri icyo gihugu ikaba yarahagaritswe kubera icyorezo cya Coronavirus, maze uyu mukinnyi ahita afata umwanzuro wo kuba agarutse mu Rwanda.
Nkuko byatangajwe n’ubuyobozi bw’ikipe ya Rayon Sport bubinyujije ku rubuga nkoranyambaga rwabo rwa Twitter, bavuze ko bamaze gusinyisha umukinnyi wo hagati mu kibuga Muhire Kevin akazabakinira muri iki gihe kingana n’amezi abiri shampiyona y’icyiro cya mbere mu Rwanda (Primus National League) igiye gukinwamo.
Uyu musore Muhire Kevin ntabwo ari ubwa mbere agiye gukinira ikipe ya Rayon Sport kuko yayinyuzemo hagati y’umwaka wa 2015 kugeza mu mwaka wa 2019, mbere y’uko yerekeza gukina mu gihugu cya Misiri, naho akaba yaraje kuhava yerekeza mu gihugu cya Oman yari amaze iminsi ari gukina.
