Umukinnyi wo hagati mu kibuga Donny Van de Beek ukomoka mu gihugu cy’Ubuholandi , yamaze kwemeranya n’ikipe ya Manchester united kuyerekezamo ku masezerano y’imyaka itanu.
Amakuru ahari aravuga ko ikipe ya Manchester united yamaze kumvikana na Van de Beek kuyerekezamo, akaba ashobora gukora ikizamini cy’ubuzima mu minsi ya vuba ,bikaba bivugwa ko ashobora kugurwa amafaranga angana na miliyoni 39 z’amayero, kongeraho miliyoni 5 z’amayero naramuka yitwaye neza muri iyi kipe ya Manchester united.
Van de Beek w’imyaka 23, ni umukinnyi w’umuhanga ukina mu kibuga hagati, aho ashobora gukina afasha ba myugariro ndetse akaba yanakina afasha ba rutahizamu, uyu musore yafashije Ajax kugera muri 1/2 cya Uefa Champions league mu mwaka wa 2018- 2019, aho yatsinze ibitego bine ndetse akaba amaze gutsinda ibitego 40 mu marushanwa yose mu myaka itatu ishize.
Uyu mukinnyi Van de Beek aramutse yerekeje muri iyi kipe, yaba abaye umukinnyi wa mbere umutoza w’ikipe ya Manchester united Ole Gunner Solskjaer’s yaba asinyishije, iyi kipe umukinnyi iheruka kwinjiza akaba ari Bruno Fernandes baguze mu isoko ry’abakinnyi ryo mu kwezi kwa mbere.
