Ikipe ya Real Madrid irakira Barcelona kuri iki cyumweru, menya byinshi mbere y’umukino wa 277 uraba uhuje amakipe yombi
Ni umukino wa 277 uraba uhuje amakipe yombi mu marushanwa yose bagiye bakina, ikipe ya Barcelona ikaba iri imbere mu ntsinzi aho yatsinze imikino 115, mu gihe Real madrid yatsinze 99 banganya imikino 62
Muri shampiyona ya Esipanye amakipe yombi amaze gutsindana inshuro 72, bivuze ko ikipe imwe muri zo iramutse yitwaye neza igatsinda umukino kuri iki cyumweru yayobora indi mu kubona intsinzi nyinshi muri La liga
Ikipe ya Real madrid kugeza ubu ni yo yabonye intsinzi ikomeye mu mateka y’uyu mukino ubwo mu mwaka w’1943 muri 1/2 mu gikombe cy’umwami yatsindaga Barcelona ibitego 11 kuri kimwe
Muri shampiyona ya Esipanye intsinzi ikomeye ku ruhande rwa Barcelona ni iyo batsinzemo ikipe y’ibwami ibitego 7:2, mu mwaka w’1950, mu gihe ku ruhande rwa Real madrid ibitego 8 kuri 2 batsinze mu mwaka w’1935 ariyo ntsinzi ikomeye babonye muri La Liga bakina na Barcelona
Lionel Messi rutahizamu Rutahizamu ukomoka muri Argentine, ukinira Barcelona niwe umaze gutsinda ibitego byinshi muri uyu mukino aho afite ibitego 26, mu gihe ku ruhande rwa Real madrid Alfredo Di Stéfano na Cristiano Ronaldo batsinze ibitego byinshi 18 mu mikino yagiye ihuza aya makipe
Mu mwaka w’1902, Alfonso Albéniz ni we mukinnyi wa mbere wavuye mu ikipe imwe muri izi ajya mu yindi, ubwo yavaga mu ikipe ya Barcelona akerekeza muri Real Madrid, mu gihe Luciano Lizarraga ari we wa mbere wavuye muri Real Madrid akajya muri Barcelona hari mu mwaka w’1905 gusa umukinnyi wavuzweho cyane ni Luis Figo ubwo yerekezaga muri Real Madrid avuye muri Barcelona mu mwaka w’2000
Umukinnyi uheruka kuva mu ikipe imwe ajya mu yindi hagati yaya makipe ni Javier Saviola mu mwaka wa 2007, kugeza ubu abakinnyi 39 nibo bamaze gukinira amakipe yombi.
Umukino wo kwishyura urahuza aya makipe yombi uteganyijwe kuri iki cyumweru ku isaha ya saa yine ukaza kubera kuri stade ya Real Madrid yitiriwe Bernabéu
Tubibutse ko mu mukino ubanza wabereye Camp Nou warangiye amakipe yombi anganyije 0:0
