Inzobere za OMS ziravuga ko bigoye kumenya niba Virus ya Covid-19 yarakorewe muri Laboratory zo mu Bushinwa
Inzobere mu bijyanye n’ibyorezo mu Muryango w’Abibumbye ishami ryita ku buzima (OMS) zimaze iminsi mu gihugu cy’Ubushinwa mu bushakashatsi ku bijyanye n’inkomoko y’icyorezo cya Coronavirus nk’ahantu hatangiriye iki cyorezo.
Nyuma y’iminsi bamaze muri kiriya gihugu cy’Ubushinwa, inzobere z’Umuryango w’Abibumbye ishami ryita ku buzima(OMS), zatangaje ko ari ibintu bigoye cyane kuba wamenya niba iyi Virus ya Covid-19 yarakorewe muri Laboratory zo mu gihugu cy’Ubushinwa mu mujyi wa Wuhan.
Nkuko byatangajwe n’uhagarariye ubu bushakashatsi bwa OMS buri gukorerwa mu gihugu cy’Ubushinwa Peter Ben Embarek yatangaje ko nta bimenyetso bihari bifatika babonye bigaragaza ko iyi virus yaba yarakorewe muri Laboratory zahariya muri Wuhan.
Yagize ati” Mu gihe tumaze aha ngaha dukora ubushakashatsi, nta kintu na kimwe twari twabona kigaragaza ko iriya virus ya Corona yaba yarakorewe muri Laboratory zahano muri iki gihugu cy’ubushinwa mu mujyi wa Wuhan, kuko bigoye cyane kumenya inkomoko yayo neza”.
Uyu muryango w’Abibumbye ishami ryita ku buzima OMS rikaba ryavuze ko kuri ubu bagiye gukomeza gukora ubushakashatsi ku bijyanye n’inkomoka y’iki cyorezo, bibanda cyane mu gice cya Aziya y’uburasirazuba bushyira amajyepfo y’uwo mugabane.
Ubushakashatsi bukaba bukomeje kugaragaza ko virus ya Corona ishobora kuba yarazanwe n’inyamaswa zizwi nk’uducurama mbere yo gukwirakwira mu bantu, ariko kugeza bakaba bataramenya neza uko byagenze kugirango igere mu bantu, ndetse bikaba bishoboka ko bitabereye mu mujyi wa Wuhan, gusa ngo bikaba binashoboka ko iyi virus yaba yarazanwe nizindi nyamaswa zitari Uducurama.
Inzobere mu kigo cya leta y’Ubushinwa gishinzwe ubuzima Liang Wannanian, yavuze ko icyorezo cya Coronavirus gishobora kuba cyari cyarageze mu tundi turere two mu gihugu cy’Ubushinwa mbere y’uko igera mu mujyi wa Wuhan.
Nkuko amakuru dukesha BBC abivuga, Iri tsinda ry’inzobere za OMS ryasabye ko hakorwa iperereza ryisumbuyeho ku ruhererekane rw’ubwikorezi n’ubucuruzi bw’ibiribwa byakonjeshejwe, kugirango hamenyekane ibindi bintu byaba byaratangije iriya virus.
Kugeza ubu kw’isi yose hamaze kugaragara abantu barenga miliyoni 106,902,907 bamze kwandura icyorezo cya Coronavirus, mu gihe abantu bagera kuri miliyoni 2,341,004 bamze guhitanwa niki cyorezo, naho abamaze gukira iki cyorezo bakaba bangana na 59,754,934.
