Kenya: Abaganga bibumbiye mu itsinda ry’abakristu gatolika bamaganye inkingo za Covid-19
Mu gihugu cya Kenya abaganga bibumbiye mu itsinda ry’abaganga b’abakristu gatolika, bashyize hanze itangazo ryo kwamagana ndetse no kuburira abatuye muri kiriya gihugu kwirinda inkingo za Covid-19.
Iri tsinda ryitwa Catholic Doctors Association of Kenya ryanditse risaba abantu bafite ibimenyetso by’icyorezo cya coronavirus ko bakwirinda gufata inkingo z’iki cyorezo, ahubwo ko bazajya bakoresha ubundi buryo mu kwivura harimo gukoresha imiti ya hydroxychloroquine na ivermectin ndetse n’uburyo bwo kwiyuka buzwi nka Steam.
Nkuko amakuru dukesha bbc abivuga, Ibyatangajwe na ririya tsinda byaje nyuma yuko igihugu cya Kenya kimaze kwakira inkingo za AstraZeneca zirenga miliyoni imwe, gusa Kiliziya gatolika mu gihugu cya Kenya ikaba yamaganye ibyo ririya tsinda ryatangaje, ivuga ko yo ishyigikiye itangwa ry’urukingo rwa Covid-19 ndetse uhagarariye OMS muri kirya gihugu yavuze ko ibyavuzwe na ririya tsinda nta shingiro bifite.
Anthony Muheria Arkepiskopi wa Kiliziya gatolika muri Kenya yagize ati “Kiliziya yacu gatolika ihagarariwe na Papa Francis, ntabwo yigeze avuga ko tudakwiye gufata urukingo, dukwiye kuzafata inkingo twese nkuko biteganijwe kuko Biremewe ko tuzifata, naho ibyavuzwe na rirya tsinda ry’abaganga ntabwo tubishyigikiye”.
