Lionel Messi yatowe nk’umukinnyi mwiza w’ukwezi kwa Gashyantare
Rutahizamu w’ikipe ya Barcelona ndetse n’ikipe y’igihugu ya Argentine Lionel Messi, niwe watowe nk’umukinnyi mwiza w’ukwezi kwa Gashyantare muri shampiyona ya Espagne la Liga.
Lionel Messi yagizwe umukinnyi mwiza w’ukwezi kwa Kabiri, nyuma yaho akomeje kwitwara neza muri shampiyona ya Espagne la Liga Santander, aho mu mikino itanu aheruka gukinira ikipe ya Barcelona amaze kuyitsindira ibitego 7 ndetse anatanga imipira ibiri yavuyemo ibitego.
Uyu mugabo watangiye uyu mwaka w’imikino adahagaze neza, kuri ubu yamaze kugaruka mu bihe bye byiza ndetse aherutse no gufasha ikipe ya Barcelona kugera ku mukino w’igikombe cy’umwami mu gihugu cya Espagne, nubwo mu mikino ya UEFA Champions League bitameze neza kuko ikipe yabo yandagarijwe ku kibuga cyabo Camp Nou, aho batsinzwe n’ikipe ya PSG ibitego 4-1.
Messi ukomeje kwandika amateka atandukanye mu mupira w’amaguru, kugeza ubu niwe mukinnyi umaze kwegukana imipira ya zahabu 6 (Ballon D’or) ndetse akaba amaze no kwegukana n’ibindi bihembo byinshi bitandukanye bimugira umukinnyi w’igihangange kuri uyu mubumbe dutuyeho.
