Rutahizamu Lionel Messi nawe yatoye Perezida ugomba kuyobora ikipe ya Barcelona
Rutahizamu w’ikipe ya FC Barcelona ndetse n’ikipe y’igihugu ya Argentine Lionel Messi, ni umwe mu bitabiriye amatora ya Perezida w’iyi kipe ku nshuro ya mbere mu myaka irenga 20 amaze akinira iyi kipe yo mu ntara ya Catalogna.
Amatora ya Perezida w’ikipe ya Barcelona yabaye kuri uyu munsi tariki ya 7 Werurwe 2021, aho abagabo batatu barimo Joan Laporta unahabwa amahirwe cyane kurusha abandi, Victor Font nawe ushobora kuba yatsinda ndetse na Toni Freixa aribo bari bahanganiye uyu mwanya wa Perezida.
Mu bantu bagaragaye mu matora harimo na Lionel Messi Kapiteni w’ikipe ya Barcelona, wagaragaye arimo gutora Perezida ugiye gusimbura Josep Maria Bartomeu weguye muri iyi kipe umwaka ushize, aho yashinjwaga kudakora neza inshingano yari yaratorewe.
Aya matora akaba yabereye kuri Stade y’ikipe ya Barcelona Camp Nou, aho Lionel Messi yagaragaye ari kumwe n’umuhungu we mukuru Thiago ndetse bakaba banafashe n’amafoto bari muri iyi Stade, ibintu bigaragaza ko uyu mukinnyi ashobora kutazasohoka muri iyi kipe nubwo amasezerano ye ageze ku musozo ndetse akaba akomeje kwifuzwa n’amakipe menshi ku mugabane w’iburayi.
Ntabwo ariwe mukinnyi w’ikipe ya Barcelona watoye wenyine kuko hari n’abandi bakinnyi batoye barimo Kapiteni wungirije Sergio Busquets , umusore muto witwa Riqui Puig , Myugariro Sergi Roberto ndetse n’umukinnyi ukina ku ruhande rw’ibumoso inyuma Jordi Alba, abandi bantu bazwi mu ikipe batoye barimo Sandro Rosell wigeze kuba Perezida w’iyi kipe ndetse na Artur Mas wahoze ari umuyobozi w’intara ya Catalogna.
