Perezida Kagame na Madamu bakingiwe icyorezo cya Coronavirus
Mu Rwanda hakomeje igikorwa cyo gukingira abaturage icyorezo cya Coronavirus gikomeje kwibasira igihugu ndetse n’isi yose muri rusange, ni muri urwo rwego kuri uyu munsi tariki ya 11 Werurwe 2021 Nyakubahwa Perezida wa Repubulika Paul Kagame na Madamu Jeannette Kagame nabo bakingiwe iki cyorezo.
Nyakubahwa Perezida wa Repubulika Perezida Paul Kagame na Madamu Jeannette Kagame bakingiriwe mu mujyi wa Kigali mu bitaro byitiriwe Umwami Faisal nkuko amakuru yaturutse mu biro by’Umukuru w’igihugu yabigaragaje.
Mu Rwanda itangwa ry’inkingo ryatangiye ubwo inkingo z’icyorezo cya Coronavirus zagezwaga mu gihugu, aho gukingira byatangiriye ku bantu basanzwe bakora mu nzego z’ubuzima, abantu bafite indwara z’akarande, abantu basanzwe bafite aho bahurira n’abantu benshi cyane, abashinzwe umutekano n’abandi.
Mu Rwanda kuva itangwa ry’inkingo ryatangira hamaze gukingirwa abantu barenga ibihumbi 200 ndetse gukingira bikaba bigikomeje.
Ubwo u Rwanda rwakiraga inkingo za mbere zatanzwe muri gahunda yiswe COVAX, Perezida Kagame yavuze ko hari hashize igihe kinini ibihugu byo ku mugabane wa Africa bitegereje kugezwaho ziriya nkingo.
