Sobanukirwa ibijyanye n’indwara y’umunaniro ukabije n’uko wayirinda

Kumva unaniwe nyuma yo kumara umwanya ukora akazi kagusaba imbaraga zaba iz’umubiri cg se izo gutekereza, ni ibintu bisanzwe mu buzima bwacu bwa buri munsi. Gusa, nyuma y’ibyo byose, iyo ufashe umwanya wo kuruhuka birashira.

Mu gihe wumva uhorana umunaniro, kabone nubwo waba waruhutse bihagije, ugakora n’ibindi bigufasha kuruhuka, nko kumva umuziki n’ibindi biruhura, ariko umunaniro ukanga ukagumaho, ushobora kuba urwaye indwara y’umunaniro ukabije.

Ni iki gitera indwara y’umunaniro ukabije?

Impamvu nyamukuru itera guhora unaniwe cyane, nubwo itazwi neza. Gusa abahanga bemeza ko yaba iterwa na mikorobe zo mu bwoko bwa virusi ndetse no kubura intungamubiri z’ingenzi, cg se ibindi bibazo mu rwungano rw’ubwirinzi n’imisemburo idakora neza.

Ibimenyetso

Ibiranga indwara y’umunaniro ukabije ni:

• Kumva urushye n’umunaniro umaze igihe kirenga amezi 6, biherekejwe n’ibindi bibazo nko kuribwa imikaya, kudasinzira neza n’ibindi.

• Kutibuka neza ibintu biheruka kuba, kutita ku bintu no kutabasha kwita ku kintu na kimwe.

• Kumva nta ntege no guhorana imbaraga nke mu mubiri

• Guteragura cyane k’umutima

• Guhorana ibibazo mu muhogo; nko kumva hokera, cg se habyimbye

• Uburibwe mu nteranyirizo (nko mu mavi, inkokora cg se ku ntoki), burangwa no gutukura cg se kubyimbirwa.

• Kuribwa umutwe bigenda bihindagurika, rimwe ukumva byoroshye ubundi bikomeye

• Kumva imbaraga zishize, nyuma yo gukora akantu koroheje cg se imyitozo ngorora mubiri

• Kuzungera

Iyi ndwara nta buryo bwihariye igira isuzumwamo. Muganga yifashisha ibimenyetso n’ibiranga iyi ndwara, bikamufasha kuba yakuvura mu buryo bunoze.

Uko indwara y’umunaniro ukabije isuzumwa

Iyi ndwara nta buryo bwihariye igira isuzumwamo. Muganga yifashisha ibimenyetso n’ibiranga iyi ndwara, bikamufasha kuba yakuvura mu buryo bunoze.

Uko ivurwa

Kugeza ubu nta muti wihariye w’umunaniro ukabije ubaho. Uburyo ivurwa, bagendera mu kurwanya ibimenyetso iyi ndwara iba yagaragaje.

Imiti ikoreshwa harimo ifasha mu kurwanya ibibazo byo gusinzira nabi n’ibindi bibazo by’imitekerereze izwi nka antidepressants.

Rimwe na rimwe antibiyotike nazo zirakoreshwa, mu kurwanya infections zishobora guturuka ku bwirinzi bw’umubiri buba bwahungabanyijwe.

Akenshi, mu kuyivura, utangirira ku gipimo kiri hasi cy’umuti ukagenda wongerwa bitewe n’uko ikibazo kimeze.

Ibyagufasha kwirinda indwara y’umunaniro ukabije

• Kurya indyo yuzuye kandi iteguye neza
• Gukora imyitozo ngorora mubiri, ariko ijyanye n’ubushobozi bwawe
• Kuryama neza ugasinzira amasaha ahagije
• Kwirinda stress ukoresheje ibigufasha kuruhuka byose nka meditation na yoga.
• Hari ubundi buvuzi bwifashishwa nka Ayurveda kimwe na acupuncture.

Ushobora no kwitabaza abahanga mu byerekeye indwara zo mu mutwe, bakaba bagufasha kurwanya iyi ndwara bakoresheje ubundi buryo butandukanye.

Akenshi ubu buryo kimwe no kwivuza neza, bishobora kugufasha gukira indwara y’umunaniro ukabije.

Src: umutihealth