Sobanukirwa itandukaniro riri hagati y’indwara ziterwa na bagiteri n’iziterwa n’imiyege
Bagiteri n’imiyege zose ni indwara ziterwa na mikorobi akenshi dukunze kuvuga ko ari infection, ariyo mpamvu akenshi usanga iyo ugiye kwa muganga babanza kugufata ibizami. Ibyo bizami biba bigamije kwerekana ubwoko bwa mikorobi yaguteye indwara kugirango bamenye imiti bari bukwandikire.
Niba bitarakubaho ariko byibuze uzi uwo byabayeho. Mu buzima bwacu duhura n’indwara zinyuranye hakabaho iziterwa n’udukoko twa mikorobi tunyuranye.
Mikorobi zikaba ziri mu byiciro 3 binyuranye;
- Imiyege (champignons/fungi)
- Bagiteri na
- Virusi
Muri iyi nkuru rero tugiye kurebera hamwe itandukanyirizo riri hagati y’indwara ziterwa na bagiteri n’iziterwa n’imiyege
Ubwandu butewe n’imiyege
Umuyege ni ikinyabuzima gikurira mu butaka, mu mwuka no mu mazi. Muri uyu muryango dusangamo imiyege igaragara n’amaso ariyo dusangamo ibihumyo, ibiyege, ibihepfu, intyabire n’ibindi biribwa n’ibitaribwa, hakanabamo imiyege itaboneshwa ijisho ari na yo irimo itera indwara.
Kugirango wandure indwara iterwa n’imiyege bisaba ko uba ufite ubudahangarwa buri hasi cyangwa se ukaba uri gufata imiti ya antibiyotike igihe kinini.
Biragora kwica imiyege kuko igira ugukomera no kwihanganira imiti myinshi. Akenshi indwara ziterwa n’imiyege ziba ku ruhu inyuma zivurwa n’imiti yo gusiga yaba ikoze nk’amavuta cyangwa ari ifu (powder/poudre).
Ubwandu butewe na bagiteri
Bagiteri ni ibinyabuzima bidakenera buri gihe kuba biri mu cyo bitera indwara ngo bibashe kororoka. Bagiteri zishobora kuba ziri zonyine haba mu butaka, mu mwuka, mu mazi, ariko iyo zigeze mu cyo zitera indwara (aha tuvuge umuntu) zinyunyuzamo intungamubiri nuko zikarekuriramo uburozi bugenda bukangiza uturemangingo tw’umubiri aho ziherereye ndetse zikahororokera, nuko uburwayi butewe na zo bukaziraho.
Urugero twatanga ni E.coli, iyo igeze mu mubiri irekuriramo uburozi bugatera guhitwa no kuruka bishobora no kuzana urupfu udafatiranye kare.
Kugirango bagiteri zinjire mu mubiri akenshi zinyura ahantu hafunguye, haba ahasanzwe hafunguye cyangwa se ahaje igikomere (ahasanzwe hafunguye ni nko mu myanya ndangagitsina, mu nzira z’ubuhumekero n’ahandi). Uretse ibyo kandi kuba amaraso adatembera neza mu mubiri na byo biha urwaho izi mikorobi zikabona uko zinjira. Ku barwaye diyabete, abageze mu zabukuru, abanywa itabi, biroroha kwandura indwara ziterwa na bagiteri. Uretse aba kandi, izi ndwara zinibasira abafite indwara zibasira ubudahangarwa bw’umubiri nk’abafite ubwandu bw’agakoko gatera SIDA.
Izi ndwara zivurishwa imiti yo mu bwoko bwa antibiyotike ikaba ari imiti yagenewe kwica izi bagiteri mu mubiri w’umuntu. Ishobora kunyobwa, gusigwa ku ruhu cyangwa guterwa mu rushinge.
Kwandura indwara ziterwa na bagiteri n’imiyege bitandukaniye he?
Imiyege na bagiteri bitandukaniye ahantu habiri h’ingenzi;
Ibinyabuzima
Bagiteri akenshi ziboneka mu moko abiri ariyo Eubacteria (izi ni zo twakita bagiteri nyazo, zikaba zifite igihu gikomeye ndetse muri zo izigenda zinafite ikizifasha kugenda) na Archaebacteria (izi ni bagiteri zifite akaremangingofatizo kamwe kandi zibera ahantu hagoye kuba nk’ahari ubushyuhe bwinshi n’ahari umunyu mwinshi).
Naho imiyege yo iba mu bwoko bumwe gusa, kandi ikaba irangwa nuko ifite akaremangingofatizo kamwe gusa.
Kuvura
Imiti ikoreshwa mu kuvura indwara ziterwa n’imiyege akenshi ni iyo gusigwa ku ruhu, iyo kunyobwa ni micye cyane. Mu cyongereza iyi miti yitwa antifungal.
Naho imiti ikoreshwa mu kuvura indwara ziterwa na bagiteri irimo amoko menshi cyane niyo mu cyongereza yitwa antibiotics. Iyi miti ibamo inyobwa, iyisigwa ndetse n’iterwa mu nshinge
Ingero
Indwara ziterwa na bagiteri twavuga
- Tetanus
- Igituntu
- Imitezi
- Mburugu
- Amaso azana imirishyi
- Kirimi
- Angine
Indwara ziterwa n’imiyege twavuga
- Ise
- Ubugendakanwa
- Ibihushi
- Ibimeme
- Ibikoroto cyangwa ibifaranga cyangwa ibisekera
Mu miti yitwa antibiyotike ariyo ivura indwara zatewe na bagiteri twavugamo
- Amoxicillin
- Erythromycin
- Ciprofloxacin
- Cefixime
- Fucidine
- Ceftriaxone
- Ampicillin
- Tetracycline
Naho ikoreshwa mu kuvura indwara ziterwa n’imiyege twavuga
- Ketoconazole
- Miconazole
- Clotrimazole
- Terbinafine
- Fluconazole
