Umuyobozi wa OMS yavuzeko imiryango y’abasangwabutaka ifite ibyago byinshi byo kwandura Coronavirus
Umuryango w’Abibumbye ishami ryita ku buzima(OMS),batangajeko imiryango y’Abasangwabutaka igizwe na kimwe cya kabiri cya miliyoni ku isi yibasirwa cyane n’icyorezo gishya cya coronavirus bitewe n’imibereho mibi, OMS ikaba ikomeje kuburira iyi miryango y’abasangwabutaka.
Umuyobozi mukuru wa OMS Tedros Adhanom Ghebreyesus yavuze ko guhera ku ya 6 Nyakanga 2020, habaruwe abantu barenga 70.000 mu basangwabutaka bo muri Amerika, ndetse hapfa abantu barenga 2000.
Tedros Yatangarije abanyamakuru ku cyicaro gikuru cy’umuryango w’abibumbye i Geneve ati: “Abasangwabutaka bakunze kugira ibibazo bikomeye by’ubukene, ubushomeri, imirire mibi ndetse n’indwara zandura n’izitandura bigatuma bashobora kwibasirwa na COVID-19 ndetse n’ingaruka zayo zikomeye.”
“OMS ikaba ihangayikishijwe cyane n’ingaruka mbi icyorezo cya coronavirusgikomeje gutera ku basangwabutaka bo muri Amerika.”
Tedros yavuze ko vuba aha, byibuze abantu batandatu bagaragaweho virus mu bantu ba Nahua muri Amazone ya Peruviya, yasabye ibihugu gufata ingamba zose zikenewe mu buzima, hibandwa cyane cyane ku gushakisha amakuru, kugerageza no gukumira ikwirakwizwa rya COVID-19. Ati: “Ntabwo tugomba gutegereza urukingo ahubwo dukwiye kurokora ubuzima ubu”.
Umuyobozi mukuru w’ishami rishinzwe ubuzima mu muryango w’Abibumbye(OMS), yasoje asaba abasangwabutaka kwirinda uko bashoboye kose kugirango iki cyorezo cya coronavirus kidakomeza kubibasira cyane, nubwo bigoye cyane kuri iyi miryango y’abasangwabutaka bitewe n’ubuzima babayemo mu mashayamba.
