Nyuma ya Iragire Saidi, Mukura Vs yamaze gusinyisha ba Myugariro 2, Nkomezi Alex na Nshimiyimana Marc Govin
Ikipe ya Mukura Victory sports, nyuma yo gutakaza bamwe mu bakinnyi bayo bari bayifatiye runini, kuri ubu nayo yatangiye kwiyubaka igura abakinnyi bazayifasha mu mwaka utaha w’imikino 2020-2021.
Nyuma y’uko iyi kipe isinyishije Myugariro Iragire Saidi wahoze akinira iyi kipe, gusa kuri ubu akaba yakiniraga ikipe ya Rayon Sports, aho bivugwako yatanzweho miliyoni 5 z’amafaranga y’urwanda kugirango yerekeze muri iyi kipe ibarizwa mu karere ka Huye, abari batahiwe ni Nkomezi Alex ndetse na Nshimiyimana Marc Govin.
Nkomezi Alex wari usanzwe akinira ikipe ya Apr Fc, nyuma yo kumugura imukuye mu ikipe ya Mukura vs yahoze akinira, ariko akaza kubura umwanya wo gukina muri iyi ipe y’ingabo z’igihugu, maze ubuyobozi bw’iyi kipe bugahitamo gutandukana nawe. Uyu musore rero akaba yamaze gusubira mu ikipe ya Mukura Vs yahoze akinira ibarizwa mu majyepfo y’urwanda.
Undi musore wamaze kumvikana n’ikipe ya Mukura vs, ni Myugariro wo ku ruhande rw’iburyo Nshimiyimana Marc Govin wari usanzwe akinira ikipe ya As Kigali, gusa akaba atarakunze kubona umwanya wo gukina bitewe nuko ku mwanya we hariho Rusheshangoga Michel ndetse iyi kipe ikaba yari imaze no kugura Rugirayabo Hassan nawe ukina kuri uwo mwanya.
Ubuyozi bw’ikipe ya Mukura Vs bukaba bwaratangajeko nyuma yo gutakaza abakinnyi barimo Ntwari Evode, Rugirayabo Hassan, bagiye gushakisha abakinnyi babasimbura mu rwego rwo gukomeza kwiyubaka ndetse ngo bakazajya no ku isoko ryo hanze y’igihugu kugirango bakureyo abakinnyi bazayifasha mu mwaka utaha w’imikino.
