Aubameyang afashije ikipe ya Arsenal gutsinda Chelsea begukana Fa Cup ku nshuro ya 14.
Nyuma y’ibitego bibiri byose byatsinzwe na Rutahizamu Pierre Emerick Emiliano Aubameyang, ikipe ya Arsenal yegukanye igikombe cya Fa Cup ku nshuro ya 14, nyuma yo gutsinda ikipe ya Chelsea.
Ni umukino wari ukomeye cyane ku mpande zombi, kuko abatoza bose yaba Frank Lampard wa Chelsea ndetse na Micheal Arteta, bari bashoye intwaro zose mu kibuga kuko buri wese yifuzaga kwegukana iki gikombe cya Fa Cup, kikaba ari igikombe kiruta ibindi byose mu gihugu cy’ubwongereza.
Ni umukino watangiranye imbaraga nyinshi cyane ku ruhande rw’ikipe ya Chelsea yatangiye isatira cyane ikipe ya Arsenal, byaje no kuyihira maze ifungura amazamu, ku gitego cyatsinzwe na Pulisic. Nyuma yo gutsindwa igitego ikipe y’abarashi yahise ikanguka, maze itangira kwataka ndetse iza no kubona kwishyura igitego yari yatsinzwe binyuze kuri Aubameyang watsinze igitego kuri penaliti, nyuma y’uko yari amaze gukorerwaho ikosa mu rubuga rw’amahina.
Ibintu byaje kuba bibi cyane ku ikipe ya Chelsea, nyuma y’uko kapiteni w’iyi kipe Cesar Azpilicueta avunikiye agasohoka mu kibuga, agasimburwa na Christensen, ndetse na pulisic akaza kugira ikibazo nawe agasohoka mu kibuga, maze ikipe ya Arsenal ifatirana ayo mahirwe iza gutsinda igitego cya kabiri nacyo cyaje gutsindwa na Pierre Emerick Aubameyang.
Ikipe ya Arsenal ikaba yegukanye iki gikombe cya Fa Cup ku nshuro ya 14 kuva cyatangira gukinwa, aho kuva mu mwaka wa 2000 imaze kwegukana ibikombe bya Fa Cup bigera kuri 7, ikaba ikurikiwe na Chelsea imaze kwegukana ibikombe bitandatu kuva muri uwo mwaka. Iki kikaba kandi ari igikombe cya mbere umutoza Arteta yegukanye kuva yagera muri iyi kipe ya Arsenal,ibi bisobanuye ko iyi kipe izagaragara mu mikino ya Europa League umwaka utaha.
