Esperance de Tunis yananiwe kurenga 1/4 ariyo yari ifite igikombe giheruka
Esperance de Tunis isezerewe ariyo yari ifite igikombe giheruka
Mu minota itanu y’igice cya mbere yonyine Esperance de Tunis yari imaze gufungura amazamu ku gitego cyatsinzwe na Bilel Bensaha kuri penaliti nyuma yuko myugariro wa El Zamalek, Mahmoud Alaa yagaruye umupira n’akaboko mu rubuga rw’amahina.
Nyuma yo kwinjizwa igitego hakiri kare El Zamalek yagerageje kuyobora umukino yirinda kwinjizwa ikindi gitego ku geza mu mpera z’igice cya mbere.
Mu gice cya kabiri cy’umukino, ku munota wa 63 w’umukino Achraf Bencharki yagerageje ishoti rikomeye cyane inyuma y’urubuga rw’amahina nuko umupira ugarurwa neza n’umuzamu wa Esperance de Tunis, Moez Benchrifia.
Ku munota wa 69 w’umukino rutahizamu unyura ku mpande wa Esperance de Tunis, Hamdou Elhouni yacenze ba myugariro ba El Zamalek ariko arekuye ishoti rikomeye cyane rigarurwa neza na Mohamed Abo-Gabal wari uhagaze mu izamu rya El Zamalek nuko umukino urangira Esperance itsinze igitego 1-0 ariko irasezererwa.
El Zamalek igeze muri ½ kirangiza izahura n’ikipe izarokoka hagati ya Radja Casablanca na TP Mazembe aho umukino ubanza Radja Casablanca yari yatsinze ibitego 2-0 mu gihe umukino wo kwishyura uteganyijwe kuwa Gatandatu, tariki 7 Werurwe.
Esperance de Tunis yari yatwaye ibikombe bibiri bya Champions League biheruka
Esperance de Tunis irasezerewe nyamara ariyo yaherukaga kwegukana ibikombe bibiri bya CAF Champions League biheruka harimo igikombe yatwaye kitavugwaho rumwe n’abakunzi b’umupira w’amaguru.
Muri 2018, Esperance de Tunis yegukanye Champions League nyuma yo gutsinda Al Ahly ibitego 4-3 mu mikino ibiri aho umukino ubanza warangiye Al Ahly itsinze ibitego 3-1 ku kibuga cyayo noneho Esperance ikaza gutsinda 3-0 mu mukino wo kwishyura.
Mu mwaka wakurikiyeho Esperance yarongeye yegukana iki gikombe nyuma yo gutsinda Wydad Casablanca mu mukino utavugwaho rumwe na benshi mu mpande zitandukanye z’Isi.
Nyuma yuko umukino ubanza urangiye amakipe yombi anganyije igitego 1-1 muri Morocco, umukino wo kwishyura ntabwo warangiye nyuma yuko Wydad Casablanca itsinze igitego bakacyanga abakinnyi bikura mu kibuga, igikombe gihabwa Esperance yari iyoboye umukino n’igitego 1-0 mbere yuko abakinnyi bikura mu kibuga.
El Zamalek yihanangirije Esperance
El Zamalek isezereye Esperance ku bitego 3-2 mu mikino ibiri aho umukino ubanza El Zamalek yatsinze ibitego 3-1 igatsindwa igitego 1-0 mu mukino wo kwishyura.
Mbere yuko aya makipe ahura muri ¼ kirangiza cya CAF Champions League yari yahuriye ku mukino uhuza ikipe yatwaye CAF Champions League na Confederation Cup nuko Zamalek iracyegukana itsinze Esperance ibitego 3-1.
Uko umukino wagenze
FT: Esperance 1-0 Zamalek (2-3 agg)
Indi mikino ya ¼ iteganyijwe Uyu munsi, tariki 7 Werurwe
15:00 — Mamelodi v Al Ahly (0-2 agg)
15:00 — Mazembe v Radja CA (0-2 agg)
21:00 — Etoile du Sahel v Wydad (0-2 agg)
