Kapiteni Aubameyang yongereye amasezerano mu ikipe ya Arsenal
Rutahizamu ukomoka mu gihugu cya Gabon usanzwe ari Kapiteni w’ikipe ya Arsenal, yamaze kongera amasezerano y’imyaka itatu azamugeza mu mwaka wa 2023 agikinira iyi kipe yo mu mujyi wa London.
Uyu mukinnyi wageze mu ikipe ya Arsenal avuye mu ikipe ya Dortumund , yari asigaje amasezerano y’umwaka umwe, dore ko ayo yari afite yari kuzarangira umwaka utaha, ndetse akaba yari yatangiye kwifuzwa n’amakipe akomeye arimo Barcelona, Manchester united nayandi menshi.
Kuva yagera mu ikipe ya Arsenal yagiye afasha iyi kipe mu busatirizi cyane, kuko amaze kuyitsindira ibitego birenga 50 mu mikino irenga 80 amaze kuyikinira, ndetse akaba yarafashije iyi kipe gutsinda umukino wa mbere wa shampiyona, ikipe ya Arsenal yatsinzemo ikipe ya Fulham, aho yatsinze igitego cya gatatu Ku mupira mwiza yari ahawe na Willian.
Uyu mugabo wafashije ikipe ya Arsenal kwegukana ibikombe bibiri uyu mwaka, birimo igikombe cya FA Cup ndetse na Community Shield, yagiye anyura mu makipe atandukanye harimo Saint Etienne, As Milan, Dortumund ndetse n’ayandi.
