Abayobozi b’ibitaro bitandukanye babyukiye mu mujyi wa Kigali gufata inkingo za Covid-19
Mu gitondo cyo kuri uyu wa Kane tariki ya 4 Werurwe 2021, Abahagarariye ibitaro bitandukanye mu gihugu baramukiye mu mujyi wa Kigali mu cyanya cyahariwe inganda i Masoro mu gikorwa cyo guhabwa inkingo za Covid-19 ngo zijyanwe mu turere dutandukanye.
Izi nkingo zigiye gutangwa muri gahunda yo gukingira abanyarwanda batandukanye iteganijwe gutangira ku munsi wejo tariki ya 5 Werurwe 2021 mu gihugu hose, Abayobozi b’ibitaro baje gutwara inkingo za Covid-19 baje bafite ibikoresho bikonjesha kugirango ziriya zitaza kwangirika.
Minisiteri y’Ubuzima yavuze ko gukingira bigomba gutangira ejo kuwa gatanu nyuma yuko inkingo za Covid-19 zaraye zakiriwe, uyu munsi zigomba kurara zigeze mu bitaro bitandukanye ndetse n’ibigo nderabuzima bya Leta mu gihugu hose kuko ariho igikorwa cyo gukingira abanyarwanda bizabera.
Biteganijwe ko gukingira bizatangirira ku bantu basanzwe bakora mu nzego zitandukanye z’ubuzima, abantu bafite indwara zababayeho karande , abantu bafite aho bakunda guhurira n’abantu benshi ndetse n’abantu bageze mu zabukuru, Leta ikaba ifite gahunda yo gukingira abantu bagera kuri 30% mu mpera za 2021 ndetse ikazagera ku bantu 60% by’abaturage bose mu mpera z’umwaka wa 2022.
Kuwa Gatatu tariki ya 3 Werurwe 2021 ni bwo Leta yakiriye inkingo za mbere za Coronavirus zo mu bwoko bwa AstraZeneca zingana 240,000, naho inkingo za kabiri zikaba zaraye zigeze mu Rwanda mu ijoro ryashize zikaba ari izo mu bwoko bwa Pfizer zingana na 102.960 ndetse u Rwanda akaba aricyo gihugu cya mbere ku mugabane wa Afurika kigezemo inkingo za Pfizer zitanzwe muri gahunda ya Covax.
