Ikipe ya APR Fc yongeye kwegukana igikombe cya Shampiyona ku nshuro ya kane yikurikiranya, ni nyuma yo gutsinda ikipe ya kiyovu Sport igitego 1-0.
Ikipe y’ingabo z’igihugu yaje gukina uyu mukino isabwa kubona inota rimwe ryonyine ubundi ikegukana igikombe cya shampiyona ku nshuro ya kane yikurikiranya.
Ni mukino utari woroshye n’agato ku mpande zombi kuko ikipe ya Kiyovu Sport yakinaga iharanira kudatwarirwaho igikombe, mu gihe ikipe ya APR Fc yakinaga ishaka intsinzi iyifasha kwegukana igikombe.
Uyu mukino wagaragayemo gufungana cyane byanatumye igice cya mbere kirangira amakipe yombi anganya ubusa ku busa kuko igitego cyahesheje APR Fc intsinzi cyabonetse mu gice cya kabiri gitsinzwe na rutahizamu Mugisha Gilbert.
Ikipe ya APR Fc ikaba yegukanye iki gikombe cya shampiyona ya 2023/2024 itaratsindwa umukino n’umwe ndetse kikaba kije kiyongera ku bindi bitatu yari yaratwaye yikurikiranya birimo Shampiyona ya 2020, 2021 ndetse n’igikombe cya shampiyona ya 2022.
Kuri ubu ikipe y’ingabo z’igihugu ikaba imaze kwegukana ibikombe bya Shampiyona 22 kuva yashingwa mu mwaka 1993, bivuze ko imaze imyaka irenga 30 ishinzwe.
