Ikipe ya Norwich City yamaze kongera kuzamuka muri Premier League
Uyu munsi tariki ya 17 Mata 2021 nibwo byamenyekanye ko ikipe ya Norwich City yari isanzwe ikina shampiyona y’icyiciro cya kabiri mu Bwongereza (Championship), yamaze kubona itike yo kuzamuka mu cyiziro cya mbere (Premier League) muri kiriya gihugu.
Ikipe ya Norwich City yabonye itike nyuma yuko amakipe ayikurikiye ariyo ikipe ya Swansea City ndetse n’ikipe ya Brentford zari zifite imikino yazo muri Championship kuri uyu munsi wa gatandatu tariki ya 17 Mata 2021 zinaniwe kubona itsinzi bituma Norwich City ihita yibonera itike iyerekeza mu cyiciro cya mbere (Premier League).
Ikipe ya Swansea City yari ifitanye umukino n’ikipe ya Wycombe Wanderers umukino waje kurangira amakipe yombi anganyije ibitego 2-2, mu gihe ikipe ya Brentford yari ifitanye umukino n’ikipe ya Millwall umukino waje kurangira makipe nayo anganyije ubusa ku busa, byatumye ikipe ya Norwich City ikomeza kuyobora urutonde rwa shampiyona n’amanota 90.
Iyi kipe y’abakinnyi barimo Teemu Pukki usanzwe uyifasha cyane mu gushaka ibitego aho amaze kuyitsindira ibitego 25 muri Championship, Max Aarons, Kieran Dowell n’abandi ndetse n’umutoza wayo Daniel Farke, baherukaga gukina Premier League mu mwaka wa 2019-2020 mbere yuko bamanuka mu cyiciro cya kabiri.
Ikipe ya Norwich City ikaba ariyo kipe yo mu cyiciro cya kabiri (Championship) ibonye itike bwa mbere mu makipe atatu agomba kuzamuka mu cyiciro cya mbere (Premier League), ubwo bikaba bivuze ko hasigaye kumenyekana andi makipe abiri azayiherekeza muri irya shampiyona ikunzwe n’abatari bacye hano kuri uyu mugabane dutuyeho.
