Manchester city yamaze gusinyisha Ferran Torres wakiniraga Valencia
Ikipe ya Manchester city yo mu gihugu cy’Ubwongereza, yamaze kwemeza ko yasinyishije umukinnyi ukina ku mpande, Ferran Torres, wari usanzwe akinira ikipe ya Valencia yo mu gihugu cya Espagne.
Uyu musore w’imyaka 20 y’amavuko, ukomoka mu gihugu cya Espagne wari usanzwe ari umukinnyi w’ikipe ya Valencia, yamaze kuba umukinnyi mushya w’ikipe ya Manchester city isanzwe itozwa n’umutoza Pep Guardiola, nyuma y’uko amaze gushyira umukono ku masezerano y’imyaka itanu azamugeza muri 2025.
Ferran Torres akimara gusinya amasezerano yavuzeko yishimiye kuza muri iyi kipe, aho yagize ati” ndishimye cyane kuba nje muri Manchester city, buri mukinnyi wese aba yifuza kuba ari mu ikipe yataka cyane kandi Manchester city n’ikipe ikina umukino wo kwataka cyane”.
Txiki Begiristain, ushinzwe ibijyanye n’umupira w’amaguru mu ikipe ya Manchester city, yavuzeko Ferran Torres ari umukinnyi mwiza, wihuta cyane, ubangutse ndetse ufite impano ikomeye cyane kandi yizerako umutoza Pep azamufasha kugera ku rundi rwego rwisumbuyeho.
Uyu musore ushobora gukina ku ruhande rw’iburyo cyangwa urw’ibumoso ndetse akaba yanakina nk’umukinnyi wo hagati mu kibuga, mu mwaka ushize w’imikino, yakiniye ikipe ya Valencia imikino 44 mu marushanwa yose, ayitsindira ibitego bigera kuri Bitandatu, naho kuva yagera muri iyi kipe ya Valencia muri 2017, yayikiniye imikino 97, atsinda ibitego 9 ndetse anatanga imipira yavuyemo ibitego igera kuri 12.
